मदिरा सेवन गरी चिकित्सकमाथि कुटपिट गरेको आरोपमा तीन जना पक्राउ

सुर्खेत । प्रदेश आयुर्वेद अस्पताल सुर्खेतमा कार्यरत दुई जना चिकित्सकमाथि हातपात गरेको आरोपमा प्रहरीले तीन जनलाई पक्राउ गरेको छ ।

प्रहरीका अनुसार पक्राउ पर्नेमा वीरेन्द्रनगर-४ भैरवस्थान बस्ने वर्ष १६, वीरेन्द्रनगर-२ कोलडाँडाका वर्ष १७ र वीरेन्द्रनगर-४ बस्ने वर्ष १६ का किशोर छन् । उनिहरुको अन्य विवरण भने खुलाइएको छैन । जिल्ला प्रहरी कार्यालय सुर्खेतका प्रवक्ता डीएसपी रामप्रसाद घर्तीका अनुसार सबै १८ वर्षमुनिका रहेकाले विवरण नखुलाइएको हो ।

अस्पतालका इञ्चार्ज समेत रहेका डा. शंकरप्रसाद रिजाल र डा. यादवप्रसाद उपाध्यायमाथि बिहीबार बेलुका हातपात भएको थियो । डा. रिजाल अस्पतलबाट घर जान लागेका थिए भने उपाध्याय अफिस जान लागेका थिए । उनीहरू दुबै जना एकैठाउँमा भेटिएकाले जम्काभेट भएका तीन जनाले हातपात गरेका हुन् ।

हातपात गर्नुको कारण भने खुलेका छैन । हातपात गर्नेहरूले अत्यधिक मदिरा सेवन गरेको पाइएको प्रहरीले जनाएको छ ।