काठमाडौं । आयोजक ब्राजिलले कोपा अमेरिका फुटबलमा विजयी सुरुवात गरेको छ । घरेलु मैदान ब्रासिलियास्थित स्टाडियो नासिओनाल माने गारिन्चामा सोमबार बिहान भएको उद्घाटन खेलमा ब्राजिलले भेनेजुएलालाई ३-० ले पराजित गरेको हो ।
ब्राजिल घरेलु मैदानमा खेलिएको कोपा अमेरिकाको २१ खेलसम्म अपराजित छ । पछिल्लो पटक ब्राजिल सन् १९७५ मा पेरुसँग घरेलु मैदानमा पराजित भएको थियो ।
ब्राजिललाई जित दिलाउन मार्क्विन्होस, नेयमार र गार्बियल बर्बोसाले एकरएक गोल गरे । कोरोनाका कारण ९ खेलाडी गुमाएको भेनेजुएलालाई ब्राजिलले सुरुवाति समयदेखि नै दवावमा राखेको थियो ।
खेलको २३ औं मिनेटमा ब्राजिलले अग्रता लियो । मार्क्विन्होसले गोल गर्दै ब्राजिललाई सुरुवाती अग्रता दिलाएका हुन् । उनले कर्नरमा आएको बल क्लियर हुन नसक्दा ६ यार्डबाट हुलमुलमा गोल गरेका थिए । उनी ४७ औं संस्करणको कोपाको पहिलो गोलकर्तासमेत बनेका छन ।
२६ औं मिनेटमा रिचार्लीसनले गोल गरे । तर, उनी अफसाइड रहेको भन्दै रेफीले उक्त गोललाई मान्यता दिएन । यस्तै, ६४ मिनेटमा ब्राजिलले अग्रता दोब्बर बनायो । ब्राजिलका लागि नेयमारले पेनाल्टीमा गोल गरेका थिए । डानिलोलाई भेनेजुएलाका लुइस मार्टिनेजले पेनाल्टी बक्समा लडाएपछि ब्राजिलले पेनाल्टी पाएको थियो ।
ब्राजिलका लागि यो नेयमारको ६७औं गोल हो । उनी ब्राजिलका महान खेलाडी पेलेको कीर्तिमानभन्दा १० गोल पछि छन । यस्तै, सकिन केही समय बाँकी रहँदा गार्बियलले गोल गरे । उनले नेयमारको पासमा गोल गोल गर्दै ब्राजिललाई ३-० को जित दिलाए ।
यस जितसँगै ब्राजिलले समूह ‘ए’ मा ३ अंक जोडेको छ । यस समूहको अर्को खेलमा केहीबेर पछि कोलोम्बिया र इक्वेडर भिड्दैछन ।
प्रतिक्रिया