भैरहवा । होटल तथा रेष्टुरेष्ट व्यवसायी संगठन, रुपन्देहीले निःशुल्क खाना वितरण गरेको छ ।
कोरोना महामारीको विषम परिस्थितिमा बिरामी तथा बिरामी कुरुवालाई मध्यनजर गर्दै खाना वितरण गरिएको संगठनका अध्यक्ष गणेश प्रसाद बेल्बासेले बताए ।
दोस्रो लहरको कोरोना भाइरस संक्रमण फैलिएपछि उपचारका लागि भैरहवास्थित युनिभर्सल कलेज अफ मेडिकल साइन्सेज शिक्षण अस्पताल (युसीएमएस)मा आएका बिरामी तथा बिरामी कुरुवालाई खाना खुवाइएको बेल्बासेले बताए । उनले यस अघि संगठनले रुपन्देहीको ओमसतिया गाउँपालिका स्थित श्री सत्य साई वृद्ध सेवा आश्रममा खाना तथा पानी समेत वितरण गरिएको बताए ।
संगठनले आयोजना गरेको कार्यक्रममा सहयोग गर्ने उद्योगी व्यवसायी तथा समाजसेवीहरुलाई उनले धन्यवाद ज्ञापन गरे । समय समयमा सामाजिक उत्तरदायित्व अन्तर्गत विभिन्न कार्यक्रमहरु गर्दै आएको र आगामी दिनमा पनि निरन्तरता दिदै जाने उनले प्रतिवद्धता व्यक्त गरे । संगठनले वार्षिक कार्ययोजना अन्तर्गत असार दोस्रो साता युसीएमएसमा रक्तदान कार्यक्रमको आयोजना गर्ने बेल्बासेले जानकारी दिए ।
जेठ २४ देखि जेठ ३१ गतेसम्म (८ दिन) सञ्चालन गरिएको कार्यक्रममा २ हजार ५ सय ५० जनालाई खाना तथा पानी वितरण गरिएको कार्यक्रम संयोजक तथा संगठनका उपाध्यक्ष लिलाधर भट्टराईले बताए ।
उनले गत वर्षको महामारीमा विभिन्न कारणले खासै कार्यक्रम गर्न नसकिए पनि यसपटक भने निःशुल्क खाना वितरण गरिएको बताए । मेडिकल कलेज क्षेत्र आसपासमा व्यवसाय सञ्चालन गर्ने व्यवसायीहरु एकढिक्का भएको कार्यक्रमले अनुभुति भएको उनले बताए । उनले कार्यक्रममा सहयोग गर्ने शुभेच्छुक तथा सहयोगीलाई धन्यवाद ज्ञापन गरे ।
संगठनले सोमबार खाना वितरण कार्यक्रमको समापन गरेको छ । संगठनका अध्यक्ष गणेश प्रसाद बेल्बासेको अध्यक्षता, कार्यक्रम संयोजक एवं संगठनका उपाध्यक्ष लिलाधर भट्टराईको स्वागत तथा सह–कोषाध्यक्ष नरेन्द्र खनालको सञ्चालनमा कार्यक्रम सम्पन्न भएको थियो ।
प्रतिक्रिया