सिन्धुपाल्चोक । अरनिको राजमार्गस्थित लिपिङ खोलाले सडक कटान गर्दै पुल भत्काउन थालेपछि तातोपानी नाकाबाट आवतजावत अवरूद्ध भएको छ ।
लिपिङ खोलाले लिपिङ पुल जोड्ने सडक नै भत्काएको छ । जसका कारण पुलको आधारस्तम्भ कमजोर बनेपछि सिन्धुपाल्चोक प्रशासनले यातायात संचालनमा रोक लगाएको छ ।
नेपाल-चीन जोड्ने मितेरी पुल पुग्नु करिब २०० मिटर अगाडि रहेको लिपिङ खोलाले कटान गरेपछि जोखिम बढेको हो ।
पुल कमजोर बनेपछि यातायात अवरूद्ध हुँदा तातोपानी भन्सारमा रहेका अत्यावश्यक स्वास्थ्य सामाग्री समेत छुटाउन सकिएको छैन ।
जिल्ला प्रशासनले यसबारे विभागीय गृह मन्त्रालय, भौतिक योजना मन्त्रालय, गृह मन्त्रालय र सडक विभागलाई समेत जानकारी गराइसकेको छ ।
पुल संरक्षण हुननसके तातोपानी नाका ठप्प हुने देखिएको छ भने यसक्षेत्रका बासिन्दालाई समेत आवतजावतमा समस्या हुनेछ । तर, अहिलेसम्म पुल संरक्षणको काम भने हुन सकेको छैन ।
यद्यपी, शनिबार मात्रै यसै क्षेत्रका जनप्रतिनिधि एवं सभामुख अग्निप्रसाद सापकोटाले भौतिक पूर्वाधार तथा यातायातमन्त्री वसन्तकुमार नेम्वाङसँग भेट गरी पुलको संरक्षण र बाढीपहिरोले सडकमा कटान गरेको विषयमा छलफल गरेका थिए ।
प्रतिक्रिया