कोपा अमेरिका : काभानीको गोलमा उरुग्वे विजयी

काठमाडौं । जारी कोपा अमेरिका २०२१ अन्तर्गत मंगलवार बिहान सम्पन्न अर्को खेलमा उरुग्वेले पाराग्वेलाई १-० गोलले पराजित गरेको छ ।

ब्राजिलको रियो डे जेनेरोमा सम्पन्न दक्षिणी समूहको अन्तिम खेलमा सर्वाधिक कोपा अमेरिका विजेता उरुग्वेले पाराग्वेलाई पराजित गरेको हो ।

उरुग्वेका लागि स्ट्राइकर एडिनसन काभानीले खेलको २१ औं मिनेटमा गोल गरे । इंग्लिश क्लब म्यानचेस्टर युनाइटेडका स्टार खेलाडी काभानीले पेनाल्टी गोल मार्फत उरुग्वेलाई अग्रता दिलाएका थिए ।

खेलको निर्धारित ९० मिनेटसम्म अरु कुनै गोल हुन नसक्दा उरुग्वेले महत्वपूर्ण जित दर्ता गरेको हो । यस अघि दक्षिणी समूहको चौथो स्थानमा रहेको उरुग्वेले यस जित पश्चात् ४ खेलमा ७ अंक बटुल्दै दोस्रो स्थान ओगटेको छ ।

क्वार्टर फाइनल खेलमा अब उरुग्वेले कोलम्बियासँग प्रतिस्पर्धा गर्नेछ भने पाराग्वेलाई पेरुको चुनौती रहेको छ ।