गठबन्धनका नेताहरुद्वारा नागरिक अगुवाहरुसँग अन्तरक्रिया, ओली प्रवृत्ति खतरनाक भएको ठहर

काठमाडौं । प्रतिनिधिसभा विघटन गराउने सरकार विरुद्ध आन्दोलनमा रहेका विपक्षी गठनबन्धनका नेताहरुले बुधरबार नागरिक समाजका प्रतिनिधिहरुसँग अन्तक्र्रिया गरेका छन् ।

संसद भवनको ल्होत्से हलमा आयोजित अन्तक्र्रियामा शीर्ष नेताहरुले आफुहरुको गठबन्धन संविधान रक्षाको लागि भएको दाबी गरे ।
नेताहरुले राष्ट्र, लोकतन्त्र र संविधानको निम्ति ओली प्रवृत्ति घातक भएको बताए ।

माओवादी केन्द्रका अध्यक्ष अध्यक्ष पुष्पकमल दाहाल प्रचण्डले ओली प्रवृत्ति परास्त गर्न नागरिक समाजसँग कार्यगत एकता भएको दाबी गरे ।

नेपाली कांग्रेसका सभापति शेरबहादुर देउवाले ओली प्रवृति भ्रष्टाचारको पर्याय भएको बताए । प्रधानमन्त्री केपी शर्मा ओलीले ‘म भ्रष्टाचार पनि गर्दिनँ, गर्न पनि दिन्नँ’ भन्ने ओलीकै पालामा सबैभन्दा बढी भ्रष्टाचार भएको दाबी गरे । उनले कमिशनका कारण खोप आउन नसकेको बताए । निवर्तमान स्वास्थ्यमन्त्रीले नै कमिसनका कारण खोप आउन नसकेको स्मरण गर्दै उनले प्रधानमन्त्रीको इच्छा विपरित कसैले कमिशन खान नसक्ने जिकिर गरे ।

नेकपा एमालेका वरिष्ठ नेता माधवकुमार नेपालले लोकतन्त्र, संविधानमाथि ओली प्रवृत्ति खतरनाक रहेको टिप्पणी गरे । उनले ओली प्रवृत्तिको पुनरावृत्ति कतै हुन नहुने धारणा राखे ।

नेता नेपालले आफूले मूल्यको राजनीति नछोड्ने प्रतिवद्धता जनाए । उनले आफु विधि, पद्धती र मूल्यको राजनीतिका लागि संघर्ष गरिरहेको जनाए ।