काठमाडौं । जनता समाजवादी पार्टी (जसपा)ले संसदीय दलको विधान पारित गरेको छ ।
जसपा संसदीय दलको मंगलबार बसेको बैठकले विधानलाई सर्वसम्मतिले पारित गरेको हो ।
सिंहदरबारस्थित संसदीय दलको कार्यालयमा बसेको दलको बैठकमा पार्टी अध्यक्ष उपेन्द्र यादव र संघीय परिषद अध्यक्ष डा. बाबुराम भट्टराई पक्षका २० जना भन्दा बढी सांसदहरुको उपस्थिति रहेको थियो । संसदीय दलको विधान पारित भएसँगै अब संसदीय दलको नेता चयन गर्ने बाटो खुलेको छ । अध्यक्ष उपेन्द्र यादव नै दलको नेतामा चयन हुने बताइएको छ ।
दलको अर्को बैठकले संसदीय दलको नेता चयन गर्नुका साथै सरकारमा सहभागी हुने मन्त्रीहरुको नाम टुङ्गो लगाउने छ । यही १० गतेपछि सरकारमा जाने तयारी जसपाले गरेको छ ।
समाजवादी पार्टी नेपाल र राष्ट्रिय जनता पार्टीबीच एकीकरण भएपनि जसपाको संसदीय दलको विधान अहिलेसम्म बनेको थिएन । विधान नहुँदा जसपाले संसदीय दलको नेता समेत चयन गरेको थिएन । तर, गत बैशाख ३० गते जसपाको ठाकुर पक्षले भक्तपुरस्थित एक रिसोर्टमा पुगेर बहुमत सांसदको उपस्थितिमा संसदीय दलको विधान पारित गरेको जनाउँदै दलको नेतामा राजेन्द्र महतोलाई चयन गरेको दाबी गरेको थियो । ठाकुर पक्षले संसद सचिवालयलाई महतो चयन भएको जानकारी गराउनु अघि नै यादव पक्षले दलको बैठक नै नबसको र नेता चयन भएको कुरा झुठ्ठा भएको जानकारी सचिवालयलाई गराइसकेको थियो ।
प्रतिक्रिया