भैरहवा । समाजवादी पार्टी सिद्धार्थनगरका अध्यक्ष अर्जुन प्रसाद जैसवालले नगरका विभिन्न वडामा विपन्न परिवारलाई राहत वितरण गरेका छन् ।
विश्वव्यापी रुपमा फैलिएको कोरोना भाइरसको संक्रमणका कारण नेपालले पनि लकडाउनको घोषणा गरेको र लकडाउन पालना गर्ने क्रममा विपन्न परिवार मारमा परेकोले राहत सामाग्री वितरण गरिएको जैसवालले बताए ।
“मानवताको धर्म अनुसार कमाएको केही अशं विपन्न परिवारलाई सहयोग गर्नुपर्छ, त्यही अनुसार नगरको १३ वटै वडामा राहत सामाग्री वितरण गरिनेछ, उनले भने ।” उनले दैनिक उपभोग्य सामाग्री चामल, भुजा र सोयाबीन वितरण गरिएको बताए । हालसम्म वडा नम्बर १, २, ६ र ११ मा २२५ परिवारलाई राहत सामाग्री वितरण गरिएको जैसवालले जानकारी दिए ।
नगर अध्यक्ष जैसवालको अगुवाईमा नगरका विपन्न परिवारलाई राहत सामाग्री वितरण गरिएको समाजवादी पार्टी सिद्धार्थनगरका सचिव राममिलन यादवले बताए ।
यस्तो कठिन परिस्थितिमा विपन्न नागरिकको घरदैलोमा पुगेर राहत वितरण गर्नु सराहनीय रहेको समाजवादी पार्टी प्रदेश ५ संसदीय दलका प्रमुख सचेतक सन्तोष कुमार पाण्डेयले बताए ।
प्रतिक्रिया