काठमाडौं । नेपालमा ६ फरक फरक ध्रुवमा रहेका कम्युनिष्ट नेताहरु आज एउटै मञ्चबाट भाषण गर्ने भएका छन् । पुष्पलाल मित्रता केन्द्रले आयोजना गर्ने एक कार्यक्रममा माओवादी ध्रुवका ३ जना, माओ बिचारधारा ध्रुवका १ जना र माक्र्सबादी लेनीनवादी ध्रुवका दुई जना नेताहरु एकै मञ्चबाट पुष्पलालका बिषयमा चर्चा गर्ने छन् ।
६ फरक अस्तित्वका पार्टी नेताहरुलाई एकै मञ्चमा आमन्त्रण गरिएपनि नेकपा एमालेका अध्यक्ष केपी शर्मा ओलीलाई भने कार्यक्रममा बोलाईएको छैन ।
पुष्पलाल मित्रता केन्द्रले आयोजना गरेको ‘नेपाली कम्युनिस्ट आन्दोलनको वर्तमान संकट र आगामी बाटो’ विषयक प्रवचन कार्यक्रममा नेकपा माओवादी केन्द्रका अध्यक्ष प्रचण्ड, एमालेका वरिष्ठ नेता माधवकुमार नेपाल, नेकपा (क्रान्तिकारी) माओवादीका अध्यक्ष मोहन वैद्य, नेकपा महासचिव विप्लव, राष्ट्रिय जनमोर्चाका अध्यक्ष चित्रबहादुर केसी र नेकपा संयुक्तका अध्यक्ष चन्द्रदेव जोशीले प्रवचन दिने केन्द्रका अध्यक्ष जगन्नाथ खतिवडाले जानकारी दिए ।
केन्द्रका अध्यक्ष खतिवडाका अनुसार ललितपुरको च्यासलस्थित तुलसीलाल स्मृति प्रतिष्ठान भवनमा दिउँसो साढे १२ बजे कार्यक्रम संचालन हुने छ ।
प्रतिक्रिया