सरकार विस्तार गर्दा महत्वपूर्ण साथी छुटेकोमा दु:ख लागेको छ : प्रधानमन्त्री देउवा

काठमाडौं । प्रधानमन्त्री शेरबहादुर देउवाले सरकार विस्तार गर्दा महत्वपूर्ण साथीहरु छुटेकोमा दुःख लागेको बताएका छन् ।

कांग्रेस सभापतिसमेत रहेका प्रधानमन्त्री देउवाले सरकार विस्तार गर्दा महत्त्वपूर्ण नेताहरू छुटे पनि आगामी दिनमा उनीहरुलाई समेट्ने प्रतिवद्धता जनाएका छन् ।

शनिबार बिहान बालुवाटारमा स्कुल अफ डेमोक्रेसीद्वारा आयोजित विश्वेश्वरप्रसाद कोइराला शताब्दी सन्दर्भ पुस्तक विमोचन कार्यक्रमलाई सम्बोधन गर्दै देउवाले भने, ‘हिजोमात्र हामीले मन्त्रिपरिषद्लाई पूर्णता दिएका छौं । आगामी दिनमा साथीहरूलाई समेटिनेछ ।’ उनले पार्टीभित्रका महत्वपूर्ण व्यक्तित्वहरुलाई समावेश गर्न नसक्नु बाध्यता भएको जनाए । उनले गठबन्धन सरकार भएका कारण सबैलाई समेटन् नसकेको जिकिर गरे । अन्य पार्टीहरुमा पनि उस्तै समस्या रहेको देउवाले बताए ।

गत असार २९ गते प्रधानमन्त्रीमा नियुक्त भएका देउवाले ८८ दिनपछि मात्र शुक्रबार मन्त्रिपरिषद् विस्तार गरेका थिए । तर, मन्त्रिपरिषद् विस्तार गर्दा प्रधान
न्यायाधीस चोलेन्द्र शमशेर जबरालाई समेत भाग छुट्याउन परेपछि उनको र प्रधानन्यायाधीस जबराको सर्बत्र आलोचना भैरहेको छ । देउवाले कांग्रेसका साधारण सदस्य रहेका गेजन्द्र हमाललाई उद्योग मन्त्री बनाएका छन् । हमाल प्रधानन्यायाधीस जबराका जेठान हुन् ।