बुटवल । शुक्रबार कोरोना भाइरसबाट संक्रमित भएका रुपन्देहीका एक युवा लकडाउनकै बीच चोरबाटोबाट नेपाल प्रवेश गरेको थाहा भएको छ ।
भारतको दिल्लीमा बस्दै आएका २५ वर्षीय युवा गत बैशाख ५ गते लकडाउनकै बीच चोर बाटोबाट आएका थिए । कोटहीमाई गाउँपालिका निवासी ती युवा ठोठरी नाकाबाट नेपाल आएको थाहाहुने वित्तिकै कोटहीमाईस्थित माझगावा आदर्श माविको क्वारेन्टाइन राखिएको थियो । भाइलाई लिन गएका उनका दाईलाई पनि क्वारेन्टाइनमा राखिएको छ । तर, उनको सम्पर्कमा अन्य को को व्यक्ति आएका थिए भन्ने कुराको ट्रेसिङ बल्ल सुरु भएको छ ।
क्वारेन्टाइनमा बसेकै अवस्थामा युवाको स्वाब परीक्षण गर्दा कोरोना पोजिटिभ देखिएको हो । राष्ट्रिय जनस्वास्थ्य प्रयोगशालामा गरिएको परीक्षणबाट उनीमा कोरोना पुष्टी भएको हो ।
बैशाख १७ गते स्वाबको नमुना टेकु प्रयोगशाला पठाइएको थियो । ती युवाको अवस्था सामान्य रहेको स्वास्थ्य मन्त्रालयले जनाएको छ । उनको बुटवल स्थित धागो काराखानाको अस्थायी कोरोना विशेष अस्पतालमा उपचार भइरहेको छ ।
प्रतिक्रिया