सोरु गाउँपालिकामा प्रमुख प्रशासकीय नहुँदा भत्ता रोकियो

मुगु । सोरु गाउँपालिका प्रमुख प्रशासकीय अधिकृतविहीन हुँदा सेवा प्रभावित भएको छ । तत्कालीन प्रमुख प्रशासकीय अधिककृत लालबहादुर मल्लको दुई महिनामै सरुवा भएपछि नयाँ प्रशासकीय नआएको गाउँपालिका अध्यक्ष लोकबहादुर शाहीले बताए ।

उनका अनुसार त्यसअघिका प्रशासकीय अधिकृत वीरेन्द्र मल्लले काममा बेवास्ता, आर्थिक अपारदर्शीता गरेपछि जिम्मेवारीबाट हटाइएको थियो । त्यसपछि लालबहादुर आएका थिए । तर उनको पनि सरुवा भएपछि समस्या भएको हो ।

प्रशासकीय नहुँदा पहिलो चौमासिकमा वितरण हुनुपर्ने सामाजिक सुरक्षा भत्ता पनि वितरण हुन सकेको छैन । पारित योजना, भुक्तानी पनि प्रभावित भएको शाहीले बताए ।

गाउँ कार्यपालिकाले नायव सुब्बा तीर्थराज शाहीलाई प्रमुख प्रशासकीय अधिकृत तोक्न मन्त्रालयसँग माग गरे पनि संघीय मामिला तथा सामान्य प्रशासन मन्त्रालयले निर्णय गरेको छैन ।