काठमाडौं । अस्पतालमा उपचाररत एक बालिकालाई कोरोना संक्रमण भएको पुष्टि भएपछि त्रिवि शिक्षण अस्पताल, महारजगञ्जका चिकित्सकसहित ३८ जना स्वास्थ्यकर्मीलाई क्वारेन्टाइनमा राखिएको छ ।
अस्पतालको न्यूरो वार्डमा उपचाररत कपिलवस्तुकी ६ वर्षीया बालिकालाई कोरोना संक्रमण भएको पुष्टि भएलगत्तै उपचारमा संलग्न चिकित्सक, नर्स, सफाईकर्मी लगायत ३८ जनालाई क्वारेन्टाइनमा पठाइएको हो ।
अस्पतालको केही बेर अघि सम्पन्न बैठकले सबैलाई क्वारेन्टाइन गर्ने निर्णय गरेको थियो ।
न्यूरो वार्डमा रहेका अन्य ५ जना बिरामीलाई गणेशमानसिंह भवनमा बनाइएको आइसोलेसन वार्डमा सारिएको छ ।
बालिकालाई उपचारका लागि काठमाडौं ल्याउने आफन्तलाई पनि क्वारेन्टाइनमा राखिसकिएको छ । उनलाई कपिलवस्तुबाट उपचारका लागि शिक्षण अस्पताल ल्याइएको थियो ।
सबैको थ्रोट स्वाब संकलन गर्ने तयारी भइरहेको अस्पतालका कोभिड–१९ व्यवस्थापन समितिका संयोजक डा। सन्त कुमार दासले जानकारी दिनुभएको छ ।
प्रतिक्रिया