एजेन्सी । बंगालको खाडीबाट उठेको चक्रवाती आँधी ‘अम्फान’ ले खतरनाक रुप धारण गरिसकेको छ ।
भारतीय मौसम विभागका अनुसार पश्चिम बंगाल र ओडिसा राज्यको तटीय क्षेत्रमा ठोक्किने चक्रवाती तुफान ‘अम्फान’ का कारण यी दुवै राज्य भर तिव्र गतिमा हावाहुरी चल्नेछ भने भारी बर्षा हुनेछ ।
सम्भावित जोखिमको पूर्वानुमान गर्दै भारतीय मौसम विभागले माछा मार्ने माझीहरुलाई आजैबाट समुन्द्री किनारामा जान रोक लगाएको छ भने पश्चिम बंगाल र ओडिसा राज्यमा हाई अलर्टको चेतावनी जारी गरिएको छ ।
भारतको कोलकतास्थित मौसम विभागका क्षेत्रीय निर्देशक जीके दासका अनुसार दुवै राज्यमा चक्रवाती तुफान अम्फानका कारण मंगलबार ५५ किलोमिटर प्रति घण्टाका दरले हावाहुरी चल्नेछ भने बुधबार ८५ किलोमिटरको गतिमा पुग्नेछ ।
भारी बर्षासहित आउने हावाहुरीको प्रकोपबाट बच्न राज्य सरकारले सबै तयारी पुरा गरिसकेको पश्चिम बंगालका मुख्य सचिव राजिव सिन्हाले बताउनुभयो । त्यसैगरि नेपालमा पनि मंगलबारबाट पूर्वी नेपालको मौसममा बदली हुने मौसम पूर्वानुमान महाशाखाले जनाएको छ ।
चक्रवाती तुफान ‘अम्फान’ को प्रभावका कारण दुईदेखि तीन दिनसम्म देशभरि बर्षा हुने छ, त्यस्तै हिमाली क्षेत्रमा हल्कादेखि मध्यम रुपमा हिमपात हुने भन्दै सचेत रहन मौसम पूर्वानुमान महाशाखाले चेतावनी दिएको छ ।
प्रतिक्रिया