एसियन च्यालेञ्जर ट्रफी क्रिकेट प्रतियोगिता, भोलीदेखि सेमिफाइनलका खेल हुने

भैरहवा । भैरहवामा जारी एसियन च्यालेञ्जर ट्रफी क्रिकेट प्रतियोगिता अन्तरगत समूह बीबाट राइनोज क्रिकेट क्लब काटमाडौँ र शंकरनगर क्रिकेट क्लब सेमिफाइनलमा पुगेका छन् ।

समूह ए बाट अर्सक क्रिकेट क्लब बंगलादेश र वेष्टन क्रिकेट क्लब बुटवल यस अघिनै सेमिफाइनलमा पुगिसकेका थिए । मंगलबार भएको खेलमा शंकरनगरले राइनोजमाथि तीन विकेटको जीत निकालेको छ । राइनोजले टच जितेर पहिले व्याटिङ गर्दै २० ओभरमा सबै विकेट गुमाएर ८८ रन बनायो । उसकालागि कमल सिंंह ऐरीले ३१ तथा रोहित कुमार पौडेलले २९ रन बनाए । अन्य खेलाडी एकल अङ्कमै प्याभिलियन फर्किन बाध्य भए ।

बलिङमा शंकरनगरका दुर्गेश गुप्ताले तीन, सहाव आलम र बिक्रम भुषाले समान दुई विकेट लिए । जवाफमा व्याटिङ गर्न आएको शंकरनगरले १९ दशमलव एक बलमा तीन विकेट बाँकी छँदै लक्ष्य पुरा ग¥यो । शंकरनगरलाई जीत दिलाउन शौरव खनालले सर्वाधिक ४१ तथा प्रज्वल थापाले १७ रन प्रहार गरे । बलिङमा राइनोजका सुर्य तामाङले तीन, रोहित कुमार पौडेलले दुई तथा कमल सिंह ऐरीले एक विकेट लिए ।

सेमिफाइन खेल बुधबार राइनोज क्रिकेट क्लब काठमाडौँ र अर्सक क्रिकेट क्लब बंगलादेश तथा शंकरनगर क्रिकेट क्लव र वेष्टन क्रिकेट क्लव बुटवल बीच हुने छ । फाइनल खेल बिहिबार हुने छ ।