एजेन्सी । विश्व स्वास्थ्य संगठनले महामारीको घोषणा गरेको कोरोना भाइरसका कारण ज्यान गुमाउनेको संख्या ५ हजार ४ सय १६ पुगेको छ । चीनको वुहानबाट फैलिएको यो भाइरसको संक्रमणबाट ५ हजार ४ सय १६ जनाको मृत्यु भएको हो ।
विश्वभर महामारीका रुपमा फैलिएको कोरोना भाइरसको संक्रमण विश्वका १ सय ३८ देशमा पुगेको छ । अहिलेसम्म १ लाख ४५ हजार ३ सय ४१ जनामा संक्रमण पुष्टि भएको छ । ति मध्ये ७० हजार ९ सय ३१ जना निको भएका छन । कोरोनाको संक्रमणबाट सबैभन्दा बढी चिनियाँ नागरिक प्रभावित भएका छन् ।
चीनमा ८० हजार ८ सय १७ जना संक्रमित भएका छन भने ३ हजार १ सय ७७ जनाले ज्यान गुमाएका छन् । अहिले चीनमा कोरोना भाइरसको संक्रमण नियन्त्रणमा आउने क्रम जारी छ । चीनले कोरोना भाइरसको संक्रमण नियन्त्रणमा भएको दाबी गरिरहँदा इटालीमा फैलने क्रम भने बढ्दो छ ।
इटालीमा अहिलेसम्म १७ हजार ६ सय ६० जनामा संक्रमण देखा परेको छ । त्यस्तै १ हजार २ सय ६६ जनाले ज्यान गुमाएका छन् । त्यसैगरि इरानमा ११ हजार ३ सय ६४ संक्रमित रहेको र ५ सय १४ जनाले ज्यान गुमाएको अन्तर्रा्ष्ट्रिय सञ्चारमाध्यमले जनाएका छन् । दक्षिण कोरियामा ज्यान गुमाउनेको संख्या ७१ पुगेको छ भने ७ हजार ९ सय ७९ जना संक्रमित छन् ।
त्यसैगरि कोरोना भाइरसको संक्रमण रोकथामका लागि अमेरिकाले अनिश्चितकालीन संकटकाल घोषणा गरेको छ । राष्ट्रपति डोनाल्ड ट्रम्पले शुक्रबार आयोजित पत्रकार सम्मेलनमा संकटकाल घोषणा गरिएको जानकारी दिएका हुन् । तर, संकटकाल कति दिनसम्म लागू हुन्छ भन्ने कुरा उनले खुलाएका छैनन् ।
प्रतिक्रिया