सियारीमा कोरोना पूर्वतयारीलाई प्रभावकारी बनाइँदै

सियारी । सियारी गाउँपालिकाले नोबेल कोरोना (COVID–19) पूर्वतयारीलाई तीव्रता दिएको छ । गाउँपालिकामा अहिले विभिन्न सचेतनामूलक कार्यक्रम, ब्यानर टाँस्ने तथा पर्चा पम्पलेट बाँड्ने कार्य भैरहेको गाउँपालिकाले जनाएको छ ।

विश्व स्वास्थ्य संगठनले कोरोनाको उच्च जोखिममा नेपाललाई राखेसँगै अहिले विभिन्न सचेतनामूलक कार्य भैरहेको र सियारी गाँउपालिकामा पनि यस खालका सचेतनामूलक कार्यक्रम भैरहेका गाउँपालिका अध्यक्ष अयोध्या थारुले जानकारी दिनुभयो ।

सियारी गाउँपालिकाका विभिन्न सरोकारवालाहरुको बैठक बसी बुधबार नै विभिन्न निर्णय गरिएको उहाले बताउनुभयो । पूर्वतयारी र त्यसपछिका अवस्थाको व्यवस्थापनका लागि साझा रणनीति तय गर्नेसमेत निर्णय भएको गाउँपालिका अध्यक्ष थारुले बताउनुभयो ।

बैठकले विभिन्न ठाउँमा सूचना प्रवाह गर्ने, ब्यानर, पम्पलेट तथा ब्रोसर वितरण, सचेतनामूलक कार्यक्रम गर्ने, कोरोनाको उच्च जोखिमलाई मध्यनजर गर्दै अति अवाश्यक कामबाहेक गाउँपालिका बासिहरुलाई घर बाहिर ननिस्किन अनुरोध गरिएको र कोरोनाको जोखिमलाई मध्यनजर गर्दै बुधबारदेखि नै लागुहुने गरि सियारीमा लाग्ने साप्ताहिक हाटबजार बन्द गर्ने निर्णयसमेत गरिएको गाउँपालिकाकी प्रवक्ता तथा पालिका उपाध्यक्ष अमृता गुरुङले जानकारी दिनुभयो ।

साथै बैठकले पूर्ण सरसफाई तथा स्वास्थ्य पोषण कार्यक्रम सफल बनाउन गाउँवासीलाई अनुरोध गरेको छ ।