बुटवल । बुटवलमा १ सय बेडको कोरोना विशेष(अस्थाई) अस्पताल निर्माण शुरु भएको छ । अस्पताल भोलीसम्म संचालन हुने गरि निर्माण थालिएको हो ।
बुटवल धागो कारखानाको फिनिसिङ ब्लकमा अस्पताल बनाइदै छ । बुटवल उप—महानगरपालिका र लुम्बिनी प्रादेशिक अस्पतालको संयुक्त सहकार्यमा बुटवल १० स्थित बन्द अबस्थामा रहेको धागो कारखानाको भवनमा अस्पताल बनाउन ८० जना काममा खटिएका छन् । नेपाल प्रहरी, नगर प्रहरी, स्थानीय युवाहरु निर्माणमा खटिएका छन् ।
निर्माण स्थलमा प्रमुख शिवराज सुवेदी र लुम्बिनी प्रादेशिक अस्पतालका अध्यक्ष सूर्यबहादुर भट्टराइसहित प्राविधिक, विशेषज्ञको टोलीले शुक्रबार बिहानैदेखि सो स्थलमा खटिनुभएको छ । निर्माण स्थलको अनुगमन तथा निरिक्षणका लागि प्रदेश सरकारका कानुन मन्त्री कुलप्रसाद केसी,प्रदेश प्रहरी प्रमुख नरबहादुर केसी लगायत पुग्नुभएको छ । लामो समयदेखि बन्द रहेको बुटवल धागो कारखानाको एउटा ब्लकलाई अस्पतालको रुपमा प्रयोग गरिएको हो ।
बुटवलमा आइसोलेशनका लागि धागो कारखानामा करिब १०० बेडको अस्पताल बनाउने काम शुरु गरिएको नगर प्रमुख शिवराज सुवेदीले बताउनुभयो । पहिलो चरणमा एउटा बलकमा एक सय बेडको आईसोलेशन कक्ष निर्माण गर्ने काम चलिरहेको नगर प्रमुख सुवेदीले बताउनुभयो ।
अहिले आईसोलेसनसंगै बाहिरी क्षेत्रमा घेरवार लगाउने, शौचालय बनाउने र भवन परिसरलाई नै संक्रमणरहित बनाउने काम भैरहेको छ । रुघाखोकी जस्ता लक्षण लिएर आउने विरामीलाई अस्पतालहरुले कोरोना संक्रमणको आशंकामा भर्ना लिन नमानेपछि बुटवलमा छुट्टै आईसोलेसन अस्पताल बनाइएको हो ।
बुटवलमा कोरोना भाइरसको संक्रमण पुष्टि भएको कुनैपनि विरामी नभेटिएपनि कोरोनासंग मिल्दो जुल्दो लक्षण लिएर दैनिक चारपांच जना विरामी आउने गरेका छन् ।
प्रतिक्रिया