काठमाडौं । संविधान संशोधनबारे छलफल गर्न प्रमुख प्रतिपक्षी दल नेपाली काँग्रेसले केन्द्रीय कार्यसमिति बैठक बोलाएको छ ।
शनिबार दिउँसो १ बजे पार्टी कार्यालय सानेपामा बैठक बस्ने काँग्रेसका मुख्य सचिव कृष्णप्रसदा पौडेलले जानकारी दिनुभएको छ ।
सरकारले संसदमा दर्ता गराएको नेपालको निशाना छाप परिवर्तनसम्बन्धी संविधान संशोधन प्रस्तावबारे काँग्रेस पदाधिकारी बैठकले केन्द्रीय कार्यसमितिबाट निर्णय गर्ने गरेको थियो ।
गत सोमबार प्रधानमन्त्रीको आह्वानमा बसेको सर्वदलीय बैठकमा सभापति शेरबहादुर देउवाले प्रस्तावका विषयमा पार्टीमा छलफल गर्नुपर्ने भन्दै केही समय माग्नुभएको थियो ।
सरकारले भारतबाट अतिक्रमित नेपाली भूमि लिम्पियाधुरा, लिपुलेक, कालापानी क्षेत्रलाई समेटेर नयाँ नक्सा जारी गरेपछि त्यसअनुसार संविधानको अनुसूचि ३ मा रहेको निसान छाप परिर्वतन गर्न संविधान संशोधन विधेयक संसद सचिवालयमा दर्ता गराएको छ ।
बुधबार संसद बैठकमा पेश गर्ने कार्यसूचि रहेपनि पेश गरिएको थिएन ।
प्रतिक्रिया