संखुवासभा । संखुवासभा जिल्लामा पहिलो पटक २ जना व्यक्तिमा कोरोना भाइरस पोजेटिभ देखिएको छ ।
भारतबाट आएका २ जनाको पिसिआर चेक गर्दा शनिबार पोजेटिभ देखिएको स्वास्थ्य कार्यालय खाँदबारी प्रवक्ता रोशन श्रेष्ठले जानकारी दिनुभयो । श्रेष्ठका अनुसार, गत बिहिबार भारतको सुनौली नाकाबाट ७ जनाको समुह संखुवासभा आएको र ति मध्ये खाँदबारी नगरपालिका–७ का २३ बर्षीय पुरुष र पाँचखपन नगरपालिका–१ का २२ बर्षीय पुरुषको शनिबार पिसिआर चेकजाँच गर्दा पोजेटिभ रिपोर्ट आएको हो ।
संक्रमित दुबै जनालाई खाँदबारी नगरपालिका–९ तुम्लिङ्गटारमा बनाइएको क्वारेन्टाइनमा राखिएको छ । ति दुवै जनालाई आइसोलेसनका लागि धरान स्थित बिपि कोइराला स्वास्थ्य विज्ञान प्रतिष्ठान पठाउने तयारी भइरहेको स्वास्थ्य कार्यालयले जनाएको छ ।
संखुवासभामा रहेको १० वटा स्थानीय तहले १ सय ८२ बेडको क्वारेन्टाइन निर्माण गरिएको छ । हाल सम्म ३० जना महिला र १ सय ४ जना पुरुष संस्थागत क्वारेन्टाइन बसिरहेका छन् भने होम क्वारेन्टाइनमा ५ महिला र १४ पुरुष बसिरहेका छन् । हाल सम्म ४ महिला र २४ पुरुषको पिसिआर रिपोर्ट नेगेटिभ आएको छ ।
प्रतिक्रिया