कोरोना भाइरस रोकथाम र नियन्त्रणका लागि सेना परिचालन गरिने

काठमाडौँ । कोरोना भाइरसको रोकथाम तथा नियन्त्रणलाई प्रभावकारी बनाउन सरकारले सेना परिचालन गर्ने निर्णय गरेको छ । आज बसेको मन्त्रिपरिषदको बैठकले विदेशबाट ल्याइने नेपालीको व्यवस्थापन तथा कोरोना संक्रमण बढी भएको स्थानहरुमा सेना परिचालन गर्ने पनि निर्णय गरेको बताईएको छ ।
सरकारले भारतबाट आउनेका लागि २० वटा नाका तोक्नुका साथै तेस्रो मुलुकमा रहेका २५ हजार नेपालीलाई नेपाल ल्याउने निर्णय गरिसकेको छ । आजै बसेको सुरक्षा परिषद्को बैठकले विदेशबाट आउने नेपालीको व्यवस्थापन तथा संक्रमण बढी फैलिएको स्थानमा सेना परिचालन गर्न सरकारलाई सिफारिस गरेको थियो ।

कतिपय स्थानमा लकडाउन उल्लंघन गर्ने, संक्रमितलाई आइसोलेसनमा ल्याउन अवरोध गर्ने, क्वारेन्टाइनबाट संक्रमित भगाउने जस्ता कार्य हुंदै आएको थियो । मन्त्रिपरिषदले सीमामा थप कडाई गर्न जनपद र शसस्त्र प्रहरी अझै बढी परिचालन गर्ने समेत निर्णय गरेको छ ।