भारत र चीनका सेनाबीच सीमा क्षेत्रमा झडप

बेलाबेलामा सीमा क्षेत्रमा सैनिकहरुबीच तनावपूर्ण सम्बन्ध झेल्दै आएका भारत र चीनबीच फेरि तनाव बल्झिएको छ ।

भारत र चीनका सैनिकहरुबीच भारतको पूर्वोत्तर प्रदेश सिक्किमको नाथुला बोर्डर क्षेत्रमा शनिबार झडप भएको छ ।झडपमा दुवैतर्फका ११ सैनिक घाइते भएको हिन्दुस्तान टाइम्सले जनाएको छ ।

समाचारमा बताइएअनुसार दुवै पक्षको बीचमा विवाद बढ्दै गएपछि झडप भएको थियो । जसमा जसमा चार भारतीय र सात चिनियाँ सैनिक घाइते भएका छन् । तर, दुवै देशका सैन्य कमाण्डरहरुको सुझवुझपछि विवाद समाधान भएको थियो । यो विवादमा एक सय ५० सैनिक सामेल भएका थिए । लामो समयको विवादपछि दुवैतर्फका सेनाहरू आफ्नो पोस्टमा फर्किएका थिए ।

सीमा क्षेत्रमा दुई देशका सैनिकहरुबीच तनाब भए पनि त्यो तनाबमा हतियार भने प्रयोग हुँदैन । एक अर्काले धकेला धकेल र मुक्काबाजी चल्ने गर्छ । भारत र चीनको सीमाक्षेत्रमा बेलाबेलामा तनाव हुने गरेको छ ।

सन् २०१७ मा भारतले तिब्बत भुटान सीमा क्षेत्रको दोक्लाममा आफ्ना सेना पठाएपछि चीन र भारतबीच ७२ दिनसम्म कुटनीतिक र सैन्य तनाब उत्पन्न भएको थियो ।

भारतले आफ्नो सीमा भित्र सेना पठाएको भन्दै चीनले भारतीय सेना फिर्ता नभए सैन्य आक्रमणसम्मको चेतावनी नै दिएको थियो । भारतले पूर्वोत्तर भारतको सिलगुढी क्षेत्रस्थित चिकन नेक जोगाउने नाममा भुटानको सीमा हुँदै चिनिया सीमाभित्र सेना पठाएको थियो ।