काठमाडौं । मंगलबार काठमाडौं उपत्यकाभित्र पुष्टि भएका कोरोना संक्रमित लकडाउनकै बीच उपत्यका प्रवेश गरेको पाइएको छ ।
केही दिनको अन्तरालपछि उपत्यकामा देखिएको कोरोना संक्रममित मध्ये काठमाडौं चन्द्रागिरी मच्छेगाउँकी ३३ वर्षीया महिला कञ्चनपुरको महेन्द्रनगरबाट आएकी हुन् । उनी सुरक्षा निकायले उपलब्ध गराउने निजी गाडीको पास बनाएर काठमाडौं प्रवेश गरेकी हुन् ।
यस्तै भक्तपुरकी २५ वर्षीया महिला बैशाख २९ गते सुनसरीबाट मोटरसाइकलको पास बनाएर उपत्यका प्रवेश गरेको थाहा भएको छ । भक्तपुरका एक संक्रमित भने नेकपा स्थायी कमिटी सदस्य एवं पूर्व गृहमन्त्री भीम रावलको सुरक्षामा खटिएका सशस्त्र प्रहरीका जवान रहेको थाहा भएको छ ।
सुरक्षा निकायले जथाभावी पास वितरण गरेपछि काठमाडौं उपत्यका छिर्नेहरु पछिल्लो दिनमा बढिरहेका छन् । यस्तै, लुकिछिपी काठमाडौं उपत्यका आउनेहरु पनि बढिरहेका छन् ।
लकडाउन उल्लंघन भएको देखिएपछि प्रधानमन्त्री केपी शर्मा ओलीले भने मंगलबारको मन्त्रिपरिषद् बैठकमा असन्तुष्टि जनाउँदै थप कडा बनाउन निर्देशन दिनुभएको थियो । साँझ गृहमन्त्रालयले एक जिल्लाबाट अर्को जिल्लामा प्रवेश गर्ने ई पासलाई खारेज गरेको थियो ।
प्रतिक्रिया