काठमाडौं । नेपाल कम्युनिष्ट पार्टी नेकपा का राष्ट्रिय सभा संसदीय दलका नेता दीनानाथ शर्माले राष्ट्रियताको सवालमा वर्तमान सरकारले ऐतिहासिक काम गरेको दाबी गर्नुभएको छ ।
राष्ट्रिय सभाको मंगलबारको बैठकमा नीति तथा कार्यक्रमको छलफलमा भाग लिँदै नेता शर्माले सरकारले नेपालको पूर्ण नक्शालाई पारित गरेर ऐतिहासिक काम गरेको बताउनुभयो । शर्माले भारतले अतिक्रमण गरेको नेपालको भूभाग फिर्ता गराएरै छाड्ने दाबी पनि गर्नुभयो ।
‘सरकारले एक कण माटो छोड्दा पनि छोड्दैन । त्यसलाई फिर्ता गरेरै छोड्छ,’ शर्माले भन्नुभयो, ‘हामी कसैले एक टुक्रा जमिन वा एक इन्च माटो अथवा एक मुठी माटोको आशा पनि गर्दैनौं ।’
सरकारले लिम्पियाधुरा, लिपुलेक र कालापानीलाई समेटेर नयाँ राजनीतिक नक्सा मन्त्रिपरिषदबाट सोमबार मात्रै पारित गरेको थियो ।
नीति तथा कार्यक्रममा नयाँ नक्सा सार्वजनिक गर्ने प्रतिवद्धता आएको त्यसै अनुसार सरकारले कार्यान्वयन गरेको उहाँले जिकिर गर्नुभयो ।
नेकपा नेता शर्माले नीति तथा कार्यक्रममाथि हालेको संशोधन प्रस्ताव फिर्ता लिन विपक्षी कांग्रेसलाई आग्रह पनि गर्नुभयो ।
प्रतिक्रिया