कोरोनाबाट मृत्यु हुन नदिने सरकारको प्रयास असफल : प्रधानमन्त्री ओली

काठमाडौं । प्रधानमन्त्री केपी शर्मा ओलीले भारतबाट भित्रिएको कोरोना संक्रमितका कारण नेपालमा संकट बढ्दै गएको बताउनुभएको छ ।

संसदमा सरकारको नीति तथा कार्यक्रममा उठेको प्रश्नहरुको जवाफ दिँदै प्रधानमन्त्री ओलीले भारतबाट आएकाहरुका कडा खालको कोरोना भाइरसको संक्रमण देखिएको बताउनुभयो ।

ओलीले कोही पनि नेपालीको मृत्यु हुन नदिने सरकारको प्रयास पुरा असफल भएको स्वीकार गर्नुभयो ।

ओलीले नेपाल कोरोनाको महामारीमा प्रवेश गरेको उल्लेख गर्दै दुई जनाको ज्यान गएकोमा दुःख समेत व्यक्त गर्नुभयो ।

उहाँले मृतकमा डब्ल्युएचओको मापदण्ड अनुसारको लक्षण देखिएकाले कोरोना नै मुख्य कारण भएको जिकिर गर्नुभयो ।

ओलीले वुहान, इटली, दुवईबाट आएको भाइरस भन्दा भारतबाट भित्रिएको भाइरस फरक र कडा खालको भएको दाबी गर्नुभयो ।

भारतबाट आएका धेरैमा संक्रमण देखिएको भन्दै ओलीले आएकाहरु लुकेर बस्दा झन समस्या भएको जिकिर गर्नुभयो ।

उभिएर बोल्दा प्रधानमन्त्रीलाई गा-हो
सम्बोधनकै क्रममा प्रधानमन्त्रीलाई उभिन अप्ठेरो भएपछि रोष्टममा कुर्चीमा बसेर बोल्ने व्यवस्था मिलाइएको छ ।

आफुलाई उभिँदा गा-हो भएकाले बस्न मिल्ने व्यवस्था गरिदिन ओलीले सभामुख अग्निप्रसाद सापकोटासँग आग्रह गर्नुभएको थियो । त्यसपछि बस्ने व्यवस्था मिलाइएको हो ।