काठमाडौं । सरकारले नेपालको नयाँ राजनीतिक नक्सा सार्वजनिक गरेको छ ।
भूमि व्यवस्था, सहकारी तथा गरिबी निवारण मन्त्री पद्मा अर्यालले बुधबार दिउँसो आयोजित पत्रकार सम्मेलनमा नयाँ नक्शा सार्वजनिक गर्नुभएको हो ।
नयाँ नक्शाले भारतले अतिक्रमण गरेको नेपालको पश्चिमी सीमामा कालापानी, लिपुलेक र लिम्पियाधुरा क्षेत्रलाई समेटेको छ ।
नयाँ नक्साअनुसार नेपालको कुल क्षेत्रफल १ लाख ४७ हजार ५ सय १६ वर्ग किलोमिटर कायम हुनेछ । अतिक्रमित भूभागको क्षेत्रफल ३३५ वर्गकिलोमिटर छ । अतिक्रमित भूभागबाहेकको नेपालको क्षेत्रफल १ लाख ४७ हजार १ सय ८१ वर्गकिलोमिटर छ ।
अब यही नक्शा नै नेपालको आधारिक नक्शा हुनेछ । संविधानको अनुसूचि ३ मा रहेको नक्शालाई परिवर्तन गर्न संविधान संशोधनको प्रक्रिया समेत सरकारले छिटै नै अघि बढाउन लागेको छ ।
मंगलबार संघीय संसद्का दुवै सदनमा सम्बोधन गर्दै प्रधानमन्त्री केपी शर्मा ओलीले भारतले अतिक्रमण गरेका भूमि फिर्ता ल्याएरै छाड्ने प्रतिवद्धता जनाउनुभएको थियो । लिम्पियाधुरा, लिपुलेक र कालापानी क्षेत्र समेटिएको नक्शालाई मन्त्रिपरिषद्ले सोमबार पारित गरेको थियो ।
प्रतिक्रिया