काठमाडौं । प्रधानमन्त्री केपी शर्मा ओलीले मुलुकभरका क्वारेन्टाइनको अवस्था तत्काल सुधार गर्न निर्देशन दिनुभएको छ ।
कोभिड–१९ क्राइसिस म्यानेजमेन्ट सेन्टर (सीसीएमसी अप्स) को कार्यालयमा पहिलो पटक पुग्नुभएका प्रधानमन्त्री ओलीले क्वारेन्टाइन केन्द्रहरुको अवस्था उदेकलाग्दो देखिएको भन्दै तत्काल सुधार्न निर्देशन दिनुभएको हो ।
प्रधानमन्त्री तथा मन्त्रिपरिषदको कार्यालयका सचिव समेत रहेका सीसीएमसी अप्सका संयोजक महेन्द्रप्रसाद गुरागाईँले ओलीलाई अहिलेको अवस्थाबारे ब्रिफिङ गर्नुभएको थियो ।
त्यसक्रममा सीसीएमसीले स्वास्थ्य सेवा तथा उपचार, आपूर्ति तथा अत्यावश्यक सेवा कार्य, शान्ति सुरक्षा कार्य र सूचना तथा प्रविधि कार्यको काम, कारबाहीबारे ओलीलाई जानकारी गराइएको थियो ।
त्यसक्रममा जेठ २० मा लकडाउन सकिएपछिको रणनीतिबारे पनि छलफल भएको थियो ।
प्रधानमन्त्री ओलीले विदेशबाट ल्याउनुपर्ने अवस्थाका नागरिकबारे चासो राख्नुभएको थियो । सबै संरचना तयार गरेपछि मात्र कति नागरिकलाई ल्याउन सकिन्छ भन्ने यकिन हुनसक्ने बारेमा प्रधानमन्त्री ओलीलाई जानकारी गराइएको थियो ।
कोभिड–१९ भाइरसको महामारी नियन्त्रण, रोकथाम तथा प्रतिकार्यका लागि सरकारले क्राइसिस म्यानेजमेन्ट सेन्टर स्थापना गरेको थियो ।
प्रतिक्रिया