बुटवल । रुपन्देहीको मणिग्रामस्थित क्रिमसन अस्पतालमा उपचार गराइरहेका गुल्मी मदानेका कोरोना पीडित पुरुषको मृत्यु भएको छ ।
४१ वर्षीय ती पुरुषको बिहीबार बिहान ७ बजेर १० मिनेटमा मृत्यु भएको प्रादेशिक स्वास्थ्य निर्देशनालयका कोभिड–१९ फोकलपर्सन डा. उमाशंकर चौधरीले पुष्टि गर्नुभयो ।
पेशाले शिक्षक रहेका उनी बिरामी भएपछि अर्घाखाँचीको एक मेडिकलमा चेकजाँच गराएका थिए । त्यसपछि उपचारका लागि उनी क्रिमशन अस्पताल आएका थिए । स्वास्थ्यअवस्था अत्यन्त नाजुक भएपछि उनलाई भेन्टिलेटरमा राखेर उपचार गरिँदै आएको थियो ।
गत जेठ १ गते उनी अस्पतालमा भर्ना भएका उनको २ गते स्वाब परीक्षण गर्दा कोरोना संक्रमण भएको प्रादेशिक जनस्वास्थ्य प्रयोगशाला भैरहवाले पुष्टि गरेको थियो ।
उनको बुधबार नै मृत्यु भएको समाचार कतिपय संचारमाध्यममा प्रकाशित प्रसारित भएको थियो । तर, स्वास्थ्य तथा जनसंख्या मन्त्रालय र अस्पतालले त्यसको खण्डन गरेका थिए ।
यससँगै नेपालमा कोरोना संक्रमणको कारण मृत्यु हुनेको संख्या ३ पुगेको छ । यसअघि सिन्धुपाल्चोककी २९ वर्षीया सुत्केरी महिला र बाँकेका २५ वर्षीय पुरुषको कोरोना संक्रमणबाटै मृत्यु भएको थियो ।
प्रतिक्रिया