बागलुङ । दुई महिनादेखि सुरक्षित रहेको बागलुङमा पुनः कोरोना भाइरसको संक्रमण देखिएको छ । एक्कैपटक बागलुङमा ६ जनामा कोरोना संक्रमण पुष्टि भएको छ ।
जिल्लाको तमानखोला गाउँपालिकाका ४ र बडिगार्ड गाउँपालिकाका २ जना व्यक्तिमा कोरोना संक्रमण देखिएको हो ।
पोखरास्थित गण्डकी प्रदेश प्रयोगशालामा गरिएको परीक्षणमा बागलुङका ६ जनामा कोरोना संक्रमण देखिएको प्रयोगशाला स्रोतले बताएका् छ । संक्रमितहरुबारे प्रदेश स्वास्थ्य निर्देशनालयमा जानकारी दिइएको छ । थप जानकारी स्वास्थ्य तथा जनसंख्या मन्त्रालयले अपरान्ह गर्ने पत्रकार सम्मेलनमार्फत आउने स्रोतले बताएको छ ।
दुवै स्थानमा देखिएका कोरोना संक्रमितलाई बागलुङ सदरमुकाममा रहेको धौलागिरि अञ्चल अस्पतालको आइसोलेसनमा पठाउने तयारी भैरहेको छ ।
तमानखोला गाउँपालिकामा संक्रमित ४ जनासँगै ८ जना आएका थिए । उनीहरुसहित १४ जना गाउँपालिकाको क्वारेन्टाइमा रहेका छन् । यस्तै, बडिगार्ड गाउँपालिकाले ६ जनाको उद्धार गरेकोमा २ जनामा कोरोना देखिएको हो । गाउँपालिकाको क्वारेन्टाइनमा २ सय १३ जना छन् । संक्रमित सबै भारतबाट आएका हुन् ।
यसअघि बागलुङमा विदेशबाट आएका दुई जना महिलामा कोरोना संक्रमण देखिएको थियो । उनीहरु निको भएर घर फर्किसकेका छन् ।
प्रतिक्रिया