कर्णाली प्रदेश सरकारबाट संघीय सरकारसँग सेना परिचालन स्वीकृति माग

सुर्खेत । कोरोना भाइरसका संक्रमितहरु प्रदेशमा बढ्न थालेपछि व्यवस्थापनका लागि कर्णाली प्रदेश सरकारले संघीय सरकारसँग सेना परिचालनको स्वीकृति मागेको छ ।

प्रदेशमा ठूलो संख्यामा भारतबाट फर्किने नागरिकहरु बढिरहेको र त्यससँगसँगै कोरोना भाइरस पनि सँगै भित्रिएको भन्दै प्रदेश सरकारले सेना परिचालन गर्नुपर्ने आवश्यकता महशुस गरेको हो ।

भारतबाट फर्किएकाहरुको उद्धार र व्यवस्थापनका लागि सेना परिचालन गर्न अनुमति मागेको प्रदेश सरकारका प्रवक्ता विमला केसीले बताउनुभएको छ ।

प्रदेशमा पछिल्लो दिनमा कोरोना संक्रमितको संख्या बढ्दै गएको छ । हालसम्म २३ जनामा कोरोना भाइरसको संक्रमण पुष्टि भैसकेको छ ।
भारतमा रोजगारी गुमेपछि कर्णालीबासी दैनिक सयौंको संख्यामा घर फर्किरहेका छन् । प्रदेश सरकारले कम्तिमा ३० हजार नागरिक घर फर्किने अनुमान गरेको छ ।