काठमाडौं । नेपाली कांग्रेसबाट मधेशको प्रतिनिधित्व गर्ने आठ सांसदले संविधान संशोधनको विधेयक दर्ता गराएका छन् ।
पार्टीको केन्द्रीय कार्यसमितिको निर्णय अनुसार भन्दै तराई मधेशबाट प्रतिनिधित्व गर्ने प्रदीप गिरी, अमरेशकुमार सिंह लगायतका आठ सांसदले संसद सचिवालयमा नेपालको संविधान दोस्रो संशोधन विधेयक २०७७ दर्ता गराएका हुन् ।
विधेयक दर्ता गर्न संसद सचिवालय पुगेका सांसदहरुले पार्टीको केन्द्रीय कार्यसमितिको निर्णय अनुसार संशोधन विधेयक दर्ता गराएको बताएका छन् ।
सांसद अमरेशकुमार सिंहले आफुहरुले दर्ता गराएको विधेयकले सबै जनतालाई समानताको बोध हुने र तराई मधेसमा भएको असन्तुष्टिलाई समेत सम्बोधन गर्ने दाबी गर्नुभयो ।
विगतमा पार्टीले दर्ता गराएको विधेयकलाई नै आधार मानेर मानिएको उहाँले बताउनुभयो । पहिला एमालेको असहयोगका कारण संविधान संशोधन असफल भयो । यसपटक पार्टीले आफै विधेयक दर्ता गराउने निर्णय गरेका कारण आफुहरुले विधेयक दर्ता गराएको सिंहको तर्क छ ।
कांग्रेस सांसदहरुले दर्ता गराएको विधेयकमा प्रदेशको सीमाना हेरफेर, नागरिकता, भाषा र राष्ट्रिय सभाको प्रतिनिधित्वको विषयमा संशोधन गर्ने विषयहरु राखिएका छन् ।
विधेयक दर्ताका लागि सांसदहरु प्रदीप गिरी, उमाकान्त चौधरी, अमरेशकुमार सिंह, चत्रलेखा यादव, चेजुलाल चौधरी, अभिशेकप्रताप शाह, नमिता चौधरी, पद्य्मनारायण चौधरी लगायत संसद सचिवालय पुगेका थिए ।
यसअघि, सरकारले नेपालको नक्शा परिवर्तन गर्नका लागि दर्ता गराएको विधेयक संसद बैठकमा पेश भैसकेको छ भने मधेश केन्द्रित दल राजपा र समाजवादी पार्टीले पनि अलग्गै विधेयक संसद सचिवालयमा दर्ता गराएका छन् ।
प्रतिक्रिया