काठमाडौं । अमेरिकी मिलेनियम च्यालेन्ज कर्पोरेसन (एमसीसी) बारे छलफल गर्न आज बस्ने भनिएको सत्तारुढ नेपाल कम्युनिस्ट पार्टी (नेकपा) को सचिवालय बैठक अन्तिम चरमा आएर स्थगित भएको छ ।
संसद बैठकमा बजेटका सम्बन्धमा मन्त्रीहरूले जवाफ दिने क्रम जारी रहेकाले बैठक स्थगित गर्नुपरेको नेकपाले जनाएको छ । संसदको छलफल लम्बिएकाले बैठक स्थगित गर्नु परेको पार्टीका महासचिव विष्णु पौडेलले बताए । उनले दुई अध्यक्षले नयाँ मिति तय गर्ने जानकारी दिए ।
आइतबार मात्र दुई अध्यक्ष ओली र प्रचण्ड बीच छलफलपछि सचिवालय बैठक बोलाइएको थियो ।
नेकपाभित्र एमसीसी पारित गर्न नहुने पक्षमा पल्ला भारि रहेको देखिएको छ । पार्टीले एमसीसीका सम्बन्धमा गठन गरेको कार्यदलले एमसीसी जस्ताको त्यस्तै पारित गर्न नहुने सुझाव दिएको थियो ।
सुरुमा एमसीसीको पक्षमा दरिलो ढंगले लागेका प्रधानमन्त्री ओली नेकपाको अघिल्लो बैठकबाट अलि पछि हटेको संकेत बुझिएको छ । अघिल्लो बैठकमा प्रधानमन्त्री लचिलो ढंगले प्रस्तुत हुंदै पार्टीमा छलफल गराएरमात्र संसदले अनुमोदन गराउन तयार भएका थिए । उनले पार्टीले एमसीसी बारेमा सहमतिका साथ निर्णय गर्ने बताएका छन् । सचिवालयको अर्को बैठकको मिति भने तोकिएको छैन ।
प्रतिक्रिया