काठमाडौं । परराष्ट्रमन्त्री प्रदीप ज्ञवालीले भारतको अनिच्छाका कारण दुईपक्षीय सीमा वार्ता हुन नसकेको बताएका छन् ।
प्रधानमन्त्री निवास बालुवाटारमा जारी सत्तारुढ नेपाल कम्युनिष्ट पार्टी नेकपा स्थायी कमिटी बैठकलाई सम्बोधन गर्दै परराष्ट्रमन्त्री ज्ञवालीले नेपाल सरकारले वार्ताका लागि भारतसँग बारम्बार पहल गर्दा पनि वास्ता नगरिएको बताएका हुन् ।
सरकारले सीमा समस्या समाधानका लागि प्रयास जारी राखेको पनि ज्ञवालीले बताए । बैठकको सुरुमै सम्बोधन गरेका नेकपा स्थायी कमिटी सदस्य ज्ञवालीले नेपालबाट गरिएका पटक पटकका पत्राचारप्रति भारतले सकारात्मक सन्देश नदिएको बताए ।
नेपालको सुदर पश्चिमी सीमास्थित लिम्पियाधुरादेखि कालापानीसम्म भूमि अतिक्रमण गरेको भारतले गत कात्तिकमा नयाँ नक्शा जारी गरेर नेपाललाई दबाबमा राख्न खोजेको थियो ।
तर, नेपालले कुटनीतिक नोटमार्फत तत्कालै विरोध गरेको थियो भने भारत विरुद्ध नेपालमा व्यापक प्रर्दशन भएको थियो । पछि गत जेठमा भारतले नेपालको भूमि हुँदै सैन्य रणनीतिको सडक उद्घाटन गरेपछि नेपालले तत्कालै प्रतिक्रिया जनाउँदै भारतीय हस्तक्षेपलाई अस्वीकार गरेको छ ।
नेपालले कात्तिकदेखि बैशाखसम्म गरेको वार्ताको पत्राचारलाई अस्वीकार गरेको भारतले नेपालले आफ्नो छुटेको जमिनलाई समेट्दै नयाँ नक्शा जारी गरेपछि र त्यसलाई संविधान संशोधन गरेर संवैधानिक मान्यता दिलाएपछि झन बढी भाउन्निएको छ ।
नेपाललाई दबाबबाटै तह लगाउने भारतीय शासक वर्गको योजना अनुसार नै नेपालसँग वार्ता नगर्ने नीति भारतले लिएको छ ।
आफ्नो संसदले नेपालको भूमि अतिक्रमण गरेर वैधानिक दाबी गरेको भारतले नेपालले प्राकृतिक रुपमा आफ्नो जमिनलाई समेटेर नयाँ नक्शा जारी गरेपछि उल्टै नेपालले वार्ताको वातावरण बिगारेको आरोप लगाउँदै आएको छ ।
प्रतिक्रिया