अमेरिकामा दैनिक एकलाख कोरोना संक्रमित बढ्ने नयाँ चेतावनी

अमेरिकाका वरिष्ठ संक्रामक रोग विशेषज्ञ डा. एन्थोनी फाउचीले देशमा दैनिक एक लाख जनामा कोरोना संक्रमण फैलिन सक्ने चेतावनी दिएका छन् ।

डा. फाउचीले अमेरिकामा अझै पनि कोरोना नियन्त्रण गर्न सक्ने अवस्था नरहेको भन्दै आगामी दिन अझै कष्टपूर्ण हुनसक्ने बताएका छन् ।

मानिसहरुले अझै पनि सामाजिक दुरीलाई पालना नगरे र मास्क लगाएनन भने अवस्था भयावह हुनसक्ने फाउचीले चेतावनी दिएका छन् ।

अहिले अमेरिकामा दैनिक ४० हजार बढीमा कोरोना संक्रमण फैलिरहेको छ । डा. फाउचीले चेतावनी दिँदै भनेका छन् कि यदि सावधानी अपनाइएन भने आगामी दिनमा दैनिक एक लाख भन्दा बढी कोरोना संक्रमण हुनेछ ।

कोरोना भाइरसबाट सबैभन्दा धेरै प्रभावित बनेको देश अमेरिकामा अहिलेसम्म २७ लाख २७ हजार बढी मानिसमा संक्रमण फैलिइसकेको छ । जसमध्ये १ लाख ३० हजार बढीको ज्यान गएको छ ।

विश्वभर कोरोना संक्रमितको संख्या १ करोड ५ लाखभन्दा बढी छ भने कोरोना संक्रमणबाट ५ लाख १३ हजारभन्दा धेरैको ज्यान गइसकेको छ ।