नेपालगञ्ज । सरकारी छाप किर्ते र नक्कली कागजात पेश गरेर ऋण प्रवाह गरेको अभियोगमा नेपालगन्ज स्थित राष्ट्रिय बाणिज्य बैंक, त्रिभुवनचोक शाखाका थप एक जना कर्मचारीलाई बाँके प्रहरीले पक्राउ गरेको छ ।
नेपालगञ्जका सुनचाँदी ब्यबसायी रिजवान अहमद जसगढले राष्ट्रिय बाणिज्य बैकको, नेपालगञ्जको त्रिभुवन चोक शाखाबाट एक करोड २५ लाख रुपैया ऋण लिएको घटनामा सरकारी छाप किर्ते र नक्कली कागजात पेश गरेर अभियोगमा बैंकका थप एक जना कर्मचारी पक्राउ परेका हुन् ।
बैंकका ऋण सिफारिस समितिका सदस्य रहेका कलबहादुर ओलीलाई प्रहरीले पक्राउ गरेको प्रहरीले जनाएको छ । यस अघि असार १२ गते नै सोहि अभियोगमा बैंकका शाखा प्रवन्धक ललितबहादुर शाही पक्राउ परिसकेका छन् । गत जेठ २७ गते पक्राउ परेका सुनचाँदी व्यवसायी जसगढमाथि अनुसन्धान गर्नेक्रममा बैंकका प्रबन्धक र कर्मचारीलाई प्रहरीले पक्राउ गरेको हो ।
सुरुमा प्रहरीले सरकारी छाप र कागजात किर्तेको अनुसन्धान गर्ने तथा सम्बन्धित बैंकको अनुसन्धानमा बैंकिङ कसुर ठहर भई आएमा बैंकिङ कसुरको मुद्दा समेत चल्ने जिल्ला प्रहरी कार्यालय बांकेका प्रवक्ता नायव प्रहरी उपरिक्षक सुवास खड्काल् जानकारी दिए । उनीहरु माथि बैंकले अनुसन्धान गरिरहेको खडकाले बताए । बैंकिङ कसुरको अनुसन्धानमा बैंकका माथिल्लो तहका कर्मचारी पनि तानिन सक्ने आकलन गरिएको छ ।
सुनचाँदी व्यवसायी जसगढले जग्गाको लालपूर्जा, नक्सा, कर तिरेको रसिद सहितका कागजपत्रहरु नक्कली बनाएर एक करोड २५ लाख ऋण लिएका थिए । जसगढले २०७६ मंसिर २२ गते ५० लाख र २०७७ जेठ २५ गते ७५ लाख बैंकबाट ऋण लिएका थिए ।
प्रतिक्रिया