काठमाडौं । पछिल्लो २४ घण्टामा नेपालमा कोरोना भाइरसका २३२ जना नयाँ संक्रमित थपिएका छन् ।
स्वास्थ्य तथा जनसंख्या मन्त्रालयमा आयोजित नियमित प्रेस ब्रिफिङमा २३ वटा प्रयोगशालामा गरिएको ४ हजार ५० नमुना परीक्षणमा २३२ जनालाई कोरोना देखिएको मन्त्रालयका प्रवक्ता प्रा.डा. जागेश्वर गौतमले बताए ।
यससँगै, हालसम्म देशभर १५ हजार २५९ जना संक्रमित भएका छन् ।
हालसम्म प्रदेश १ मा ६६६ जना संक्रमित भएका छन् भने प्रदेश २ मा सबैभन्दा धेरै ४ हजार ८३ जनालाई संक्रमण पुष्टि भएको छ ।
यसैगरी, बागमती प्रदेशमा ५३५ जना, गण्डकी प्रदेशमा १ हजार ३३ जनामा कोरोना संक्रमण देखिएको छ ।
यस्तै, प्रदेश ५ मा ३ हजार ९४२ जना, कर्णाली प्रदेशमा १ हजार ५४० जना र सुदुरपश्चिम प्रदेशमा ३ हजार ५८२ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
हालसम्म क्वारेन्टिनमा रहेका व्यक्तिहरुको संख्या ३३ हजार १२५ रहेको छ । आइसोलेसन सेन्टरमा ९ हजार ४२ जनाले उपचार गराइरहेका छन् ।
कोरोना भाइरस संक्रमणबाट निको भएर घर फर्किएकाहरु हालसम्म ६ हजार ४१५ जना रहेका छन् । जसमध्ये शनिबार २७२ जना डिस्चार्ज भएका छन् ।
कोरोना भाइरसको विश्वव्यापी महामारी १०० वर्ष अघि भएको स्पेनिस फ्लु पछिको सबैभन्दा ठूलो महामारी बनेको छ । महामारीबाट वच्न व्यक्ति आफै पहिलो सचेत बन्न आवश्यक देखिएको छ ।
प्रतिक्रिया