सिन्धुपाल्चोक । अविरल वर्षापछि गएराति भोटेकोशी नदीमा आएको बाढीले सिन्धुपाल्चोकको बाह्रविसेमा दुई जनाको मृत्यु भएको छ । १८ जना वेपत्ता भएका छन् ।
राति ११ बजेबाट भोटेकोशी र ठाडोखोलामा आएको बाढीले ठूलो क्षति पुगेको हो । बिहानैबाट हराएकाहरुको खोजी कार्य थालिएको छ ।
भोटेकोशी नदीले बाह्रबिसे–तातोपानीको सडकखण्डको अरनिको राजमार्गका विभिन्न ठाउँ कटान गरेकाले नेपाली सेना, सशस्त्र प्रहरी र नेपाल प्रहरी घटनास्थलमा पुग्न घुमाउरो बाटो भएर जानुपरेकाले विस्तृत विवरण आउन बाँकी भएको जिल्ला प्रहरी कार्यालयका प्रमुख प्रहरी उपरीक्षक प्रज्ज्वल महर्जनले बताए ।
घटनामा घाइते भएकाहरुको हेलिकोप्टरमार्फत उद्दारको प्रयास गरिएको छ । जुरेदेखि नै सडकमा क्षतिपुगेका कारण उद्दारमा कठिनाई भएको छ ।
बाह्रविसे नगरपालिकाका प्रमुख निमफुञ्जो शेर्पाले दिएको जानकारीअनुसार खागदल र आधीखोलामा आएको बाढीले खागदल खोलाको पुल बगाउनुका साथै ठाउँठाउँमा सडक बगाएकाले आवतजावत गर्न कठिनाइ भएको छ ।
बाह्रबिसे नगरपालिका वडा नं ५ को जम्बुमा गएको बाढीबाट मानवीय क्षति भएको हो । सो ठाउँमा ८ घर बगेका छन् । बाढीले अरनिको राजमार्गमा समेत क्षति पुगेको छ ।
बाढीले सडक बगाएसँगै भोटेकोशी गाउँपालिका र बाह्रबिसे नगरपालिकाको सम्बन्ध समेत विच्छेद भएको छ । बाढीले मध्यभोटेकोशी जलविद्युत आयोजनामा पनि क्षति पुर्याएको छ । बाढीले खाटचौरमा अरनिको राजमार्गको पक्की पुल समेत बगाएको छ ।
तस्बिर दिनेश थापाको फेसबुकबाट
प्रतिक्रिया