काठमाडौं । नेपालको सुरक्षा अङ्गका प्रमुखहरुले नयाँ संस्कारको थालनी गरेका छन् । नेपाल प्रहरीको महानिरीक्षकमा शैलेश थापा बढुवा भएसँगै अर्को सुरक्षा अङ्गका प्रमुख नेपाल प्रहरी कै प्रधान कार्यालय पुगेर बधाई ज्ञापन गर्ने परम्पराको थालनी भएको छ ।
नेपाली सेनाका प्रधानसेनापति पुर्ण चन्द्र थापा प्रहरी प्रधान कार्यालय पुगेर बधाई दिएको ३ दिन पछि सशस्त्र प्रहरी महानिरीक्षक शैलेन्द्र खनालले नवनियुक्त प्रहरी महानिरीक्षक शैलेश थापा क्षेत्रीलाई बधाइ एवम् शुभकामना दिन प्रहरी प्रधान कार्यालय पुगेका छन् ।
सशस्त्र प्रहरी महानिरीक्षक खनालले प्रहरी महानिरीक्षक थापा क्षेत्रीलाई प्रहरी प्रधान कार्यालयमा मंगलबार भेटघाट गरी नेपालप्रहरीको सर्वोच्च पद प्रहरी महानिरीक्षकमा नेपाल सरकारद्वारा नियुक्ति हुनुभएकोमा सफल कार्यकालको शुभकामना सहित हार्दिक बधाइ दिएका हुन् ।
भेटघाटका अवसरमा सशस्त्र प्रहरी महानिरीक्षक खनाल र प्रहरी महानिरीक्षक थापा क्षेत्रीबीच दुबै संगठनबीच आपसी हित, सहकार्य र समन्वयका सम्बन्धमा छलफल समेत भएको थियो ।
उक्त अवसरमा प्रहरी महानिरीक्षकथापा क्षेत्रीले सशस्त्र प्रहरी महानिरीक्षक खनाललाई मायाको चिनो स्वरूप ‘मोमेन्टो’प्रदान गरेका थिए ।
भेटघाटका अवसरमा प्रहरी अतिरिक्त महानिरीक्षक हरि बहादुर पाल, सशस्त्र प्रहरी अतिरिक्त महानिरीक्षकहरू लगायत दुवै संगठनका वरिष्ठ प्रहरी अधिकृतहरूको समेत उपस्थिति रहेको थियो ।
प्रतिक्रिया