काठमाडौं । नेपाल आयल निगमले खाना पकाउने एलपी ग्यासको आपूर्ति तथा बिक्रीवितरण प्रणालीलाई पुरानै अवस्थामा फर्काएको छ । निगमले बुधबार (असार ३१) देखि देशभर १४.२ केजी क्षमताका ग्यास सिलिन्डर पुनः बिक्रीवितरण गर्ने व्यवस्था मिलाएको जनाएको छ ।
निगमका अनुसार १४.२ केजी क्षमताको ग्यास सिलिन्डरको मूल्य साविकबमोजिम दुई हजार ६० रुपैयाँ कायम रहनेछ ।
ग्यास आपूर्तिमा देखिएको असहज अवस्थाका कारण निगमले केही समयका लागि ७.१ केजी ग्यास भर्ने अस्थायी व्यवस्था लागू गरेको थियो । आपूर्ति अवस्था सुधार भएसँगै उक्त व्यवस्था अन्त्य गरिएको निगमले जनाएको छ ।
निगमद्वारा जारी सूचनामा इन्डियन आयल कर्पोरेशनका विभिन्न बोटलिङ प्लान्ट तथा रिफाइनरीबाट ग्यास लोडिङको अवस्था सुधार भएको र उपभोक्ताबाट १४.२ केजी ग्यास सिलिन्डरको माग उच्च रहेकाले पुरानै प्रणाली लागू गरिएको उल्लेख छ ।
हाल भारतबाट नियमित रूपमा खाना पकाउने ग्यास आयात भइरहेको निगमले जनाएको छ । आपूर्ति प्रणाली सहज रहेकाले आवश्यकताअनुसार मात्र ग्यास खरिद गर्न र अनावश्यक रूपमा भण्डारण नगर्न पनि निगमले उपभोक्तासँग आग्रह गरेको छ ।
प्रतिक्रिया