नेपालगञ्ज । ४३ करोड हिनामिना भएको मुद्दामा अभियुक्त बनाईएका सहकारी वित्तीय विकास संस्था लिमिटेड, नेपालगञ्जका अध्यक्ष हरदेवबक्स चौधरीलाई अदालतले पुर्पक्षका लागि कारागार चलान गरेको छ ।
झण्डै १ वर्ष अगाडी ४३ करोड रुपैयाबढी हिनामिना भएको खुलासा भए लगत्तै सहकारीका अध्यक्ष चौधरी फरार थिए । साउन मान्न लुकिछिपि घर आएका चौधरीलाई गत साता प्रहरीले नेपाल भारत सिमा जमुनाहाबाट पक्राउ गरेको थियो । चौधरीलाई बिहीबार अदालतले पुर्पक्षका लागि कारागार पठाएको हो ।
प्रहरीले अदालतमा पेश गरेको मुद्दामा सहकारी घोटालामा ४१ जनालाई प्रतिवादी बनाइएको छ । तीमध्येमा अध्यक्ष चौधरीसहित आठ जना कारागार पुगेका छन् । कारागार पुग्नेमा गोपाल भण्डारी, गंगाधर सुवेदी, अरुण पाठक, गौरव श्रेष्ठ, बलराम यादव, सूर्य विक र रविन्द्र थापा रहेका छन् ।
बाँके प्रहरीका अनुसार, २७ जना प्रतिवादी अदालतमा उपस्थित भएका छन् । अदालतमा उपस्थित भएका मध्य गौरव श्रेष्ठ र रबिन्द्र थापालाई अदालतले कारागार चलान गरेको थियो । सहकारीका संचालकहरु सहित ६ जना अझै फरार रहेका छन् ।
सहकारी पीडितहरु संघर्ष समिति नै बनाएर आन्दोलनमा उत्रिएका छन् । अध्यक्ष चौधरी पक्राउ परेपछि आफहरुले जम्मा गरेको निक्षेप रकम फिर्ता हुनेमा आशाबादी भएका पीडितहरु बिहीबार अदालत आसपासमा पुगेका थिए ।
प्रतिक्रिया