काठमाडौं । चीन र अमेरिकाबीचको तनाबपूर्ण सम्बन्ध दिनप्रतिदिन बढ्दैछ ।
अमेरिकाले होस्टनस्थित चिनियाँ कन्सुलेट कार्यालय ७२ घण्टाभित्र बन्द गर्न दिएको निर्देशन विरुद्ध चीनले जस्तालाई तस्तै रणनीति अख्तियार गरेको छ ।
चीनको दक्षिणपश्चिम प्रान्त सिचुवानको राजधानी छेन्दुमा रहेको अमेरिकी कन्सुलेट कार्यालय बन्द गर्न चीनले आदेश दिएको छ ।
चिनियाँ विदेश मन्त्रालयले शुक्रबार बिहान छेन्दुको कन्सुलेट कार्यालय बन्द गर्न र सबै गतिविधि रोक्न निर्देशन दिएको साउथ चाइना मर्निङ पोष्टले जनाएको छ ।
अमेरिकाले विश्वव्यापी कुटनीतिक मान्यता विपरित शत्रुतापूर्ण व्यवहार गर्दै होस्टनको कन्सुलेट कार्यालय बन्द गर्न दिएको आदेशविरुद्ध चीनको यो प्रतिक्रिया अपेक्षित थियो । अमेरिकी कदमले अन्तर्राष्ट्रिय कानुन तथा अन्तर्राष्ट्रिय सम्बन्धका आधारभूत मान्यतालाई उल्लंघन गरेको चीनले आरोप लगाएको छ।
“चीनले लिएको उपाय अमेरिकाले गरेको नाजायज कार्यलाई वैधानिक र आवश्यक जवाफ हो। यो अन्तर्राष्ट्रिय कानून, अन्तर्राष्ट्रिय सम्बन्धको आधारभूत मान्यता र परम्परागत कुटनीतिक अभ्यासको अनुरूप छ, ”एक मन्त्रालयले विज्ञप्तिमा भनेको छ।
चीन(अमेरिका सम्बन्धको वर्तमान अवस्था चीनले हेर्न चाहेको होइन । यसको सम्पर्ण जिम्मेवार अमेरिका हो । हामी एक पटक फेरि अमेरिकालाई आफ्नो गलत निर्णय तुरुन्त फिर्ता लिन र द्विपक्षीय सम्बन्धलाई ट्र्याकमा ल्याउन आवश्यक अवस्था सिर्जना गर्न आग्रह गर्दछौं। ” चिनियाँ विदेशमन्त्रालयको विज्ञप्तिमा उल्लेख गरिएको छ । चीनले अमेरिकासँग उत्तेजक कदम सच्चाउन समेत आग्रह गरेको छ ।
अमेरिकामा रहेका चिनियाँ कुटनीतिज्ञहरुमाथि अमेरिकाबाट दूव्यर्ववहार र भौतिक आक्रमणका घटना हालैका दिनमा बढेको भन्दै चीनले आपत्ति प्रकट गर्दैआएको छ ।
प्रतिक्रिया