प्रहरी हेडक्वाटर पुग्यो कोरोना संक्रमण, १ जना हवल्दार सहित ३ प्रहरीमा कोरोना देखियो

काठमाडौं । नेपाल प्रहरीको प्रहरी प्रधान कार्यालय सवारी शाखामा कार्यरत चार जना प्रहरी अधिकारीमा कोरोना भाइरसको संक्रमण पुष्टि भएको छ ।

नक्सालस्थित प्रधान कार्यालयको सवारी शाखामा कार्यरत प्रहरीलाई संक्रमण देखिए पछि संक्रमण देखिएका सहित उनीहरुको सम्पर्कमा आएका अन्य अधिकारीहरु पनि स्वाव संकलन गरेर परीक्षणका लागि पठाईएको प्रहरीले जनाएको छ ।

केन्द्रीय प्रहरी प्रवक्ता डीआईजी निरजबहादुर शाहीले कोरोनाको लक्षणसँग मिल्दो जुल्दो गरि ४ जनालाई ज्वरो आएपछि परीक्षण गराईएको जानकारी दिए । उनले ज्वरो आएका ४ जना सहित उनीहरुको सम्पर्कमा आएका अन्यको पनि स्वाव केन्द्रीय प्रयोगशाला टेकुमा पठाईएको बताए ।

प्रहरी श्रोतका अनुसार सवारी व्यवस्थापन शाखामा कार्यरत एक हवल्दार र सञ्चार निर्देशनालयमा कार्यरत तीन प्रहरीमा कोरोना संक्रमण पुष्टि भएको हो ।

कन्ट्याक ट्रेसिङमा परेर परीक्षण गरिएका थप केहीमा संक्रमण पुष्टि भएको प्रहरी श्रोतले बताएको छ ।
प्रहरी प्रवक्ता शाहीले आधिकारीक जानकारी स्वास्थ्य मन्त्रालयले दिने बताए । शाहीका अनुसार अहिलेसम्म देशभर १ सय १५ जना प्रहरीमा कोरोना संक्रमण भएको र धेरैजसो निको भइसकेको छ ।