काठमाडौं । अमेरिका लैजाने प्रलोभनमा पारी रकम ठगी गर्दै हिंड्ने २ जना महिला प्रहरीको फन्दामा परेका छन् ।
महानगरीय अपराध महाशाखा मिनभवनबाट खटिएको प्रहरीले उनीहरुलाई रुपन्देहीको बुटवल पुगेर पक्राउ गरेको हो ।
पक्राउ पर्नेमा भक्तपुर रोजभिलेज कोलोनी बस्ने बाग्लुङ काठेखोला गाँउपालिका(२ घर भएका २७ वर्षीया कोपिला शर्मा र १९ वर्षीया अमिसा केसी रहेका छन् ।
प्रहरीका अनुसार उनीहरुले विभिन्न व्यक्तिहरुलाई फेसबुक, टिकटकमार्फत फलो गर्ने र आफू अमेरिकाको डिभी परी अमेरिकाको क्यालिफोर्नियामा बस्दै आएको, बिहे गरे पश्चात् अमेरिका लैजाने भन्ने प्रलोभन दिई रकम ठगी गर्ने गर्दथे ।
उनीहरुले पछिल्लो ब्यक्तिसँग ६ लाख ६० हजार रुपैयाँ ठगी गरेको खुलेपश्चात घटनाको अनुसन्धान महाशाखाबाट खटिएको प्रहरीले रुपन्देही बुटवल पुगेर उनीहरुलाई पक्राउ गरेको हो ।
उनीहरुले विभिन्न बहानामा पटक पटक गरी ५ लाख रुपैयाँ ठगी गरेको तथा शर्माले भक्तपुरको एक पीडितको छोरीसँग मितेरी लगाई अमेरिका लैजान्छु भन्ने बिश्वास दिलाई १ लाख ६० हजार रुपैयाँ ठगी गरेको प्रहरीले जनाएको छ ।
निक्की पौडेलको नाममा फेक आइडीबाट फिल्म क्षेत्रका ब्यक्तिहरुलाई समेतआफूसँग बिहे गरेमा अमेरिका लैजाने भनी ठगी गर्न खोजेको अनुसन्धानबाट खुल्न आएको महाशाखाले जानकारी दिएको छ ।
उनीहरुलाई ठगी मुद्दामा आवश्यक कारवाहीका लागि महानगरीय प्रहरी वृत्त ठिमी भक्तपुर पठाइएको प्रहरीले जनाएको छ ।
प्रतिक्रिया