जनकपुर । कोरोना भाइरसको उच्च जोखिम बढ्दै गएपछि जनकपुरधाम उपमहानगरपालिकामा सोमबार रातिदेखि निषेधाज्ञा जारी गरिएको छ ।
उपमहानगरपालिका क्षेत्रमा सोमबार राति १२ बजेदेखि लागु हुनेगरी निषेधाज्ञा जारी गरिएको जिल्ला प्रशासन कार्यालय धनुषाले जनाएको छ ।
आइतबार बसेको जिल्ला सुरक्षा समितिको बैठकले स्थानीय प्रशान ऐन २०२८ र संक्रमक रोग ऐन २०२० अनुसार एकसाताका लागि निषेधाज्ञा जारी गर्ने निर्णय गरेको जिल्ला प्रशासनले जनाएको छ ।
निषेधाज्ञाको समयमा अत्यावश्यक सेवाका काम बाहेक अन्यलाई घरभित्रै बस्न आग्रह गरिएको छ । निषेधाज्ञाको उल्लंघन गर्नेलाई कानुन अनुसार कारवाही गर्ने प्रशासनले चेतावनी दिएको छ ।
निषेधाज्ञा जनकपुरधाम उपमहानगरपालिकाका सबै वडाको साथै उत्तरमा महेन्द्रनगर नजिकको औरही पुलसम्म जारी रहनेछ ।
यसअघि, वीरगन्ज, राजविराज जलेश्वर र बारा जिल्लामा यसअघि नै निषेधाज्ञा जारी भैसकेको छ ।
प्रतिक्रिया