बुटवल । लुम्बिनी प्रादेशिक अस्पताल बुटवलमा उपचारमा आएका बिरामीमा कोरोना पुष्टि भएको छ । अस्पतालमा भर्ना भएर उपचार गराइरहेका कपिलवस्तुका एक जना बिरामीमा कोरोना भाइरस संक्रमण पुष्टि भएको हो ।
कपिलवस्तुबाट निमोनियाको उपचार गर्न अस्पताल आएका २२ वर्षिय पुरुषलाई आइतबार अस्पतालको आकस्मिक कक्षमा भर्ना भएर सोमबार साधारण बेडमा सारिएको अस्पतालका प्रवक्ता डा. बिष्णु गौतमले जानकारी दिए ।
प्रादेशिक अस्पतालको प्रयोगशालामै भएको परीक्षणमा अस्पतालमा उपचाररत कपिलवस्तुका एक पुरुषमा कोरोना संक्रमण देखिएको हो ।
प्रवक्ता डा. गौतमका अनुसार निमोनियाको उपचारका क्रममा केहि कोरोनासँग मिल्दो लक्षण देखिएपछि उनको स्वाव संकलन गरि कोरोना परीक्षण गरिएको थियो ।
अस्पतालमा नै उपचाररत बिरामीमा कोरोना संक्रमण पुष्टि भएपनि यसपटक अस्पतालले उपचारमा संलग्न चिकित्सक र स्वास्थ्यकर्मीलाई क्वारेन्टिनमा बस्न बाध्य नपार्ने भएको छ ।
मास्क, पञ्चा र एप्रोन लगाएर उपचारमा संलग्न चिकित्सक र स्वास्थ्यकर्मीहरु क्वारेन्टिनमा जान आवश्यक नरहेको अस्पतालका प्रवक्ता डा. गौतमले बताए । ‘घरमा साना बाच्चाहरु भएका वा आफुलाई असुरक्षित महसुस गरेका स्वास्थ्यकर्मी भने अस्पताल भित्रै क्वारेन्टिनमा बस्न सक्ने छन्’, उनले भने ।
प्रवक्ता गौतमले प्रादेशिक अस्पतालको प्रयोगशाला सोमबार गरिएको परीक्षणमा रुपन्देहीको तिलोत्तमा र स्याङ्जाका एक–एक जना पुरुषमा पनि कोरोना संक्रमण पुष्टि भएको बताए ।
तिलोत्तमाका संक्रमित कपिलवस्तु स्थित एक मेडिकलमा औषधि किनेका र मेडिकलका सञ्चालकका छोरीहरुमा कोरोना संक्रमण भएको भन्ने थाहा पाए लगत्तै पीसीआर परीक्षण गराउन अस्पताल आएको उनले बताए ।
उनले स्याङ्जाका संक्रमितको यात्रा अभिलेखमा बिदेशबाट आएको देखिएको बताए । संक्रमित आफैं पीसीआर परीक्षण गराउन अस्पतालको ल्याबमा आएका थिए । संक्रमितहरु सबैलाई आइसोलेसनमा राखेर उपचार थालिएको डा. गौतमले बताए ।
डा. गौतमका अनुसार तीन जनामा कोरोना संक्रमण पुष्टि भएलगत्तै सबै निकायहरुमा जानकारी गराएर कन्ट्याक्ट ट्रेसिङको काम अघि बढाईएको छ भने अस्पताललाई सेनिटाइज्ड गरेर सबै सेवा सुरु गरिएको छ ।
प्रतिक्रिया