काठमाडौं । गौतम बुद्धबारे भारतका विदेशमन्त्री एस जयशंकरले दिएको अभिव्यक्तिप्रति प्रमुख प्रतिपक्षी नेपाली काँग्रेसले आपत्ति जनाएको छ ।
भारतका विदेशमन्त्री जयशंकरले शनिबार एक भर्चुअल मिटिङमा बुद्ध भारती भनेर प्रचारवाजी गरेका थिए ।
नेपाली काँग्रेसका प्रवक्ता विश्व प्रकाश शर्माले ट्वीट गर्दै जयशंकरको अभिव्यत्तिप्रति आपत्ति जनाएका हुन् ।
शर्माले ट्वीटमा लेखेका छन्, ‘बुद्ध नेपालमा जन्मिएका हुन् भनेर संसारमा कहिँबाट दर्ता प्रमाण हामीले मागेका छैनौं । भारतीय भूमिबाट विगतमा आएका टिप्पणीपनि नेपाल बुद्ध भूमी हो भनेर स्वयं भारतीय प्रम नरेन्द्र मोदीले हाम्रो संसदमा बोलेपछि खारेज भइसकेको हो । फेरिपनि आपत्तिजनक टिप्पणी अत्यन्तै दुःखद छ ।’
जयशंकरले शनिबार भनेका थिए, ‘हामी सबैले आजसम्मकै महान भारतीय भनेर चिन्ने दुई जनालाई हो । पहिलो गौतम बुद्ध र दोस्रो महात्मा गान्धी । र, हामीले मात्र होइन यी दुईलाई यसरी चिन्ने पुरै विश्वले नै महान् भारतीयका रुपमा चिन्छ,’
गौतम बुद्ध भारतमा जन्मेको एस जयशंकर दाबीलाई शर्माले आवेगको जवाफ भनेका छन् । प्रधानमन्त्री केपी शर्मा ओलीले गत असार २९ गते रामको जन्मभूमि अयोध्या भएको बताएका थिए ।
ओलीले शनिबार चितवनको माडी नगरपालिकाका पदाधिकारीहरुसँगको भेटमा समेत रामको जन्मभूमि अयोध्या माडीमा भएको दोहो¥याउँदै राम, सीता, हनुमान र लक्ष्मणको मूति बनाउन निर्देशन दिएका थिए ।
भारतका विदेशमन्त्री एस जयशंकरले २०७२ साल असोजमा संविधान जारी हुनुअघि नेपाल आएका नेपालका नेताहरुलाई धम्की दिँदै संविधान जारी गर्ने प्रक्रिया रोक्न दबाब दिएका थिए ।
जयशंकरको दबाबलाई अस्वीकार गरेका नेपाली नेताहरुले असोज ३ गते संविधान जारी गरेलगत्तै भारतले नेपालमाथि अमानवीय नाकावन्दी थोपरेको थियो ।
भारतीयहरुले बुद्धबारे निरन्तर भ्रम र अफवाह फैलाउँदै आएका छन् । जयशंकरको पछिल्लो अभिव्यक्ति त्यसैको कडी हो ।
नेपालको पहिलो औपचारिक भ्रमणमा आएका बेला भारतका प्रधानमन्त्री नरेन्द्र मोदीले २०७१ साल साउनमा तत्कालिन व्यवस्थापिका संसदलाई सम्बोधन गर्दै बुद्ध नेपालमा जन्मेको भनेर बोलेका थिए ।
तर, त्यसको केही दिनपछि जापान भ्रमणका क्रममा मोदीले बुद्ध भारतीय भएको भन्दै जापानी पर्यटकहरुलाई बुद्धको देशमा घुम्न आग्रह गरेका थिए ।
प्रतिक्रिया