काठमाडौं । कोरोना भाइरसको संक्रमणबाट थप दुई जनाको मृत्यु भएको छ । बाँकेको कोहलपुरस्थित नेपालगन्ज मेडिकल कलेजमा उपचाररत एक वृद्धाको साउन २५ गते निधन भएको स्वास्थ्य तथा जनसंख्या मन्त्रालयले जनाएको छ ।
साउन २३ गते भर्ना भएकी ती महिलाको २५ गते अर्थात आइतबार दिउँसो ३ बजेर १० मिनेट जाँदा मृत्यु भएको मन्त्रालयका प्रवक्ता प्राडा. जागेश्वर गौतमले जानकारी दिए । उनमा उच्च रक्तचापको समस्या रहेको थियो ।
यसैगरी काठमाडौं काठमाडौं- १० मध्यवानेश्वर निवासी एक वृद्धको आज ज्यान गएको छ । स्वास्थ्य समस्या भै चावहिलस्थित मेडिकेयर अस्पतालमा उपचाररत ७६ वर्षीय ती वृद्धको उपचारकै क्रममा मृत्यु भएको डा. गौतमले बताए ।
यसअघि सोमबारै थप तीन जनाको मृत्यु भएको समाचार सार्वजनिक भैसकेको थियो ।
जसमध्ये ललितपुरको मेडिसिटी अस्पतालमा निधन भएका काठमाडौंको ट्याङ्ला फाँटका पुरुष र पर्साको वीरगन्जमा आइतबार निधन भएकी महिलाको मात्रै पुष्टि मन्त्रालयले गरेको छ ।
यसबाहेक, जनकपुरमा आइतबार मृत्यु भएका एक व्यक्तिमा पनि मृत्यु पश्चात कोरोना संक्रमण पुष्टि भएको थियो । उनको औपचारिक पुष्टि भने मन्त्रालको नियमित पत्रकार सम्मेलनमा गरिएको छैन ।
स्वास्थ्य मन्त्रालयको तथ्यांक अनुसार कोरोना भाइरसको संक्रमणबाट मृत्यु हुनेको संख्या ७९ पुगेको छ ।
प्रतिक्रिया