सिन्धुपाल्चोक । सिन्धुपाल्चोकमा प्राकृतिक विपत्तिले सताउने क्रम क्रम रोकिएको छैन । सिन्धुपाल्चोकको जुगल गाउँपालिका लामा टोलमा पहिरो जाँदा पाँच घरपरिवार वेपत्ता भएका छन् ।
जुगल गाउँपालिका वडा नं. २ को लिदिको लामा टोलमा गए शुक्रबार बिहान पहिरो जाँदा १३ घर पुरिएका हुन् । जहाँ ५ घरपरिवार वेपत्ता भएका छन् ।
पाँच घरका कतिजना मानिस वेपत्ता भएका भएका छन् भन्नेबारेमा अझै एकिन नभैसकेको जुगल गाउँपालिकाका उपाध्यक्ष श्रीजना तामाङले जानकारी दिइन । बिहान गएको पहिरोले ती घर पुरिएका हुन् ।
पहिरोमा धेरै मानिस हताहत भएको हुनसक्ने सिन्धुपाल्चोकका प्रहरी प्रमुख एसपी प्रज्ज्वल महर्जनले बताए ।
आफ्नो क्षेत्रमा पहिरोको घटना थाहा पाउनेवित्तिकै सभामुख अग्निप्रसार सापकोटा हेलिकोप्टरमार्फत घटनास्थलमा गएका छन् ।
पुरिएका घरका १५ जना पहिरोबाट वच्न सफल भएका छन् । उनीहरु अहिले अप्सीचौरभन्ने स्थानमा बसेका छन् ।
अहिले पनि त्यस स्थानमा पहिरो झरिरहेको छ । गएराति परेको पानीका कारण पहिरो गएको उपाध्यक्ष श्रीजना तामाङले बताइन् ।
घटनास्थलमा खोजी तथा उद्दारकार्यका लागि निरन्तर पहिरो गएका कारण अप्ठेरो भएको छ । २५–३० घर अझै पनि जोखिममा रहेका छन् ।
प्रमुख जिल्ला अधिकारी उमेशकुमार ढकालले घटनास्थलमा सेना र प्रहरीलाई पठाएको जानकारी दिए ।
जनप्रतिनिधि एवं पार्टी नेतृत्वको टोली हेलिकप्टरसहित उद्धारमा जाँदै गरेको वाग्मती प्रदेशका सामाजिक विकासमन्त्री युवराज दुलालले बताए ।
सिन्धुपाल्चोककै मेलम्चीमा गत साउन १९ गते गएको पहिरोमा पुरिएर ८ जना मजदुरको मृत्यु भएको थियो । मेलम्चीमा नगरपालिकाको कभर्ड हल बनाउन बसेका मजदुरको मृत्यु भएको थियो ।
यसअघि गत असार २४ गते बाह्रविसे नगरपालिकामा गएको बाढी पहिरोमा वेपत्ता भएका २२ जना अझै पनि फेला पर्न सकेका छैनन् ।
१९ साउनमा सिन्धुपाल्चोकको मेलम्ची नगरपालिका–११ मा पहिरोमा पुरिएर ८ जनाको मृत्यु भएको थियो । यस्तै २४ असारमा गएको बाढी पहिरोमा बेपत्ता भएका २२ जना अझै फेला परेका छैनन् ।
प्रतिक्रिया