कोरोना संक्रमणका कारण पोखरामा फेरि अर्का एक वृद्धको मृत्यु

पोखरा । कोरोना भाइरसको संक्रमणका कारण पोखरामा मंगलबार बिहान फेरि अर्को एक जनाको मृत्यु भएको छ ।

पोखरा महानगरपालिका वडा नं. १६ का ८७ वर्षीय वृद्धको मंगलबार बिहान पौने ११ बजे मृत्यु भएको पोखरा स्वास्थ्य विज्ञान प्रतिष्ठानले जनाएको छ ।

डायबिटिज र मिर्गौलाका दीर्घ रोगी ती वृद्धलाई स्वास्थ्यमा समस्या आएपछि गत आइतबार अस्पताल भर्ना गरिएको थियो । उच्च ज्वरो र स्वाश्वप्रश्वासमा समस्या आएपछि उनलाई हिजो आईसीयूमा भर्ना गरिएको थियो ।

अस्पतालको इमरजेन्सीमा भर्ना गरिएका उनको स्वाव परीक्षण गर्दा सोमबार कोरोना संक्रमण पुष्टि भएको थियो । उनलाई संक्रमण पुष्टि भएपछि उपचारमा संलग्न १३ जना चिकित्सक र स्वास्थ्यकर्मीहरुलाई क्वारेन्टिनमा पठाइएको छ । इमरजेन्सी वार्ड बन्द गरिएको छ ।

अर्को अस्पतालबाट प्रतिष्ठानमा रेफर गरिएका उनलाई सीधै इमरजेन्सीमा राखेर उपचार गराउँदा ठूलो संख्यामा चिकित्सक स्वास्थ्यकर्मीलाई क्वारेन्टिन पठाउनु परेको छ । अस्पताल भर्ना हुन आएका बिरामीलाई कोरोना भएनभएको निक्र्यौल नगरी प्रिआइसोलेसनमा नराखेर अस्पतालमा लापरवाही भएको स्वास्थ्यकर्मीहरुले बताएका छन् ।
यसअघि मंगलबार बिहानै कोरोना संक्रमणकै कारण तनहुँकी एक महिलाको मृत्यु भएको थियो ।
पोखरा महानगरापालिका लगायत कास्कीमा कोरोना संक्रमण बढ्दै गएपछि कास्की प्रशासनले मंगलबार राति १२ बजेदेखि भदौ ७ गते राति १२ बजेसम्म निषेधाज्ञा जारी गरेको छ ।