विराटनगरमा ६५ वर्षीय कोरोना संक्रमितको मृत्यु

विराटनगर । विराटनगर महानगरपालिकामा फेरि अर्का एक कोरोना संक्रमितको मृत्यु भएको छ । विराटनगर ८ का ६५ वर्षीय पुरुषको आइतबार राति मृत्यु भएको हो ।

मृतकको गत बिहीबार स्वाब संकलन गरिएको थियो । तर, हिजो आइतबार रिपोर्ट पोजेटिभ आएको थियो । कोरोना संक्रमण पुष्टि भएलगत्तै उनलाई कोशी अस्पतालको कोभिड १९ उपचार केन्द्रमा भर्ना गरिएको थियो । तर राति ११ बजे मृत्यु भएको हो ।

श्वासप्रश्वासमा गम्भीर समस्या भएपछि उनलाई अस्पताल भर्ना गरिएको थियो ।

मृतक पुरुष संक्रमितको कन्ट्याक ट्रेसिङमा परेका व्यक्ति हुन् । मृतकको परिवारमा थप तीन जना संक्रमित रहेका छन् ।

अहिले शव व्यवस्थापनको तयारी भैरहेको महानगरले जनाएको छ ।

योसँगै महानगरमा मात्रै कोरोना संक्रमणले मृत्यु हुनेको संख्या १० पुगेको छ ।

विराटनगर महानगरमा मात्रै हालसम्ममा संक्रमितको संख्या ८ सय १३ पुगेको छ । जसमा १ सय ६७ जना निको भएर घर फर्किसकेका छन् ।